Lionell Messi tambe den e wega di fogeo aki
WILLEMSTAD: Durante un conferencia di prensa ofreci pa Federashon Futbol Korsou (FFK) e siman aki, a divulga cu ya caba nan ta trahando riba e caminda cu ta hiba mundo pa e Copa Mundial di Futbol di 2026.
Y loke a wordo treci dilanti, ta cu e seleccion di futbol di Curaçao lo bay hunga Diamars dia 28 di Maart venidero, un wega di fogeo (wega di training) contra e campeon mundial actual, esta e seleccion di Argentina. E invitacion aki a drenta for di Federacion Asociacion Futbol Argentina (AFA) pa Curaçao hunga un wega contra nan.
Hecho ta cu Federacion FFK kier clasifica pa e Copa Mundial 2026 y pesey nan kier participa na mas hopi wega di fogeo posible, pero di nivel halto.
Debi na un structura nobo di federacion di Concacaf, e chens pa clasifica pa Copa Mundial ta mas grandi cu Curaçao lo por participa den e campeonato grandi ey.
Segun FFK a divulga, e astro di futbol Lionel Messi tambe lo bay ta hungando den e wega di Argentina vs. Curaçao, pero lo ta solamente 20 minuut riba veld.
Ainda nan no por divulga e stadion pa e wega di Argentina vs. Curaçao, y tampoco por divulga oficialmente e horario di e wega. Hecho si ta cu e lo ta na e pais Suramericano.
E wega aki lo bay bira un sorto di celebracion di Argentina pa cu e Copa Mundial, y a invita Curaçao y tambe team di Panama pa bay hunga wega contra nan.
Curaçao vs Canada: Tambe riba Diasabra 25 di Maart 2023, e seleccion di Curaçao lo enfrenta seleccion di Canada den un wega cu lo tuma lugar na e isla mes, y lo start pa 9:00 pm. E wega lo ta den Stadion Ergilio Hato, y lo cobra 25 Florin pa entrada general y 175 Florin pa entrada VIP. Curaçao ta identificando su mes awor como e ‘Blue Wave’, e ‘Ola Blauw’, y nan ta kere cu e Ola Blauw aki por gana tur bataya.
Chens pa bay Copa America: E wega di Curaçao vs Canada ta relaciona cu competencia di ‘Nations League’, y net e siman aki a haya informacion cu henter e formato di Nations League lo bay cambia. E cambio aki ta hopi faborable pa Curaçao, y nan ta orguyoso cu nan por keda den A-League.
Esey nifica, cu den A-League, e team di Curaçao ta keda den Top 16 teamnan. Den pasado tabatin 3 poule di 4 team cu a suma 12 team. Awor e lo bira 16 team, y esey nifica cu 4 equipo di B-League ta subi. Nations League lo keda cu A-League, B-League, y C-League. Aki e 41 teamnan lo keda distribui den nan categoria, anto lo importante ta cu desde September, October y November caba a forma un ‘partnership’ entre Concacaf y Conmebol (organizador di Copa America), y como cu Curaçao ta den A-League, esey nifica cu nan mester participa den Gold Cup tambe den 2023 na luna di Juni.
Banda di esey, entrante September 2023 ta haya e chens, si Curaçao sali den e mihor seis team den Nations League, nan lo participa den Copa America na 2024.
Esey nifica, cu e A-League cu Curaçao ta aden ta bira 16 team, y esaki pues ta djis algun trapi leu pa por yega na participa den Copa America. E mihor 4 team mesora ta clasifica pa Copa America, y e 4 team cu a perde den Quarterfinals, lo hunga contra otro y e dos mihor ta sigui bay ariba, y e ora ey esey ta forma e seis teamnan cu ta bay ariba, y nan lo participa den Copa America.
Na Juni y Juli 2023 ta bay enfoca riba Gold Cup, y entrante September, October, y November lo tin clasificacion pa e parti di Copa America. Siguientemente den e prome cuartal di 2024 ta bay dicidi kendenan lo bira e seis paisnan cu ta bay Copa America.
Federacion FFK tin un plan traha pa e team di Curaçao cana su caminda rumbo pa Copa Mundial 2026, y di banda di Concacaf un total di 8 pais (di e total di 48 rond mundo) lo por participa den Copa Mundial 2026, y pa Curaçao esaki ta un chens grandi pa ta den esaki.
