Byron Boekhoudt di Santa Rosa:
*Un mensahe importante pa piscadonan den tempo di Cuaresma
ORANJESTAD (AAN): Tin e pensamento cu pasobra un biaha pa aña so bo ta bay lama, e ora no mester tuma precaucion y haci un 'check list' di tur instrumento cu mester pa loke ta seguridad.
Relaciona cu e tema aki, Byron Boekhoudt di Santa Rosa (LVV) a declara cu si no ta tene na consideracion e risiconan e consecuencianan por ta hopi grave.
P'esey ta importante pa keda corda tur e gruponan di esunnan mas 'bakia', e grandinan cu a pasa den tur sorto di lama, cu lama bo tin cu respet'e. Zorg pa bo ta prepara cu cosnan simpel. No bay wayaba, no haci fiesta riba lama pasobra cos por bay fout den un frega di wowo. Coriente y biento ta pusha bo masha rapido mes den profundidad den lama grandi y mas tempo transcuri, mas grandi e area di buskeda ta bira y tin menos chens di restate, Boekhoudt a remarca.
Bay prepara, wak pa tur hende sa unda bo ta y pa ki ora nan por warda bo na cas pa asina por bati alarma na tempo, wak pa bo tin e ekiponan di seguridad pa si algo pasa nan haya bo rapido riba lama.
Den e dianan aki biento ta extra fuerte y rafaganan hopi duro mes cu por causa hopi problema. Ta recomenda na e piscadonan pa no bay core riesgo pa tiki pisca extra, tiki placa extra. Bay pa bo seguridad prome, el a remarca.
Esunnan cu ta busca pisca den e temporada aki di Cuaresma no bay warda te na ultimo pa pisca y despues bo ta haya bo cu e malasuerte cu biento ta duro.
Otro recomendacion ta cu ta come pisca henter aña. No pa Cuaresma so. Si bo haya pisca mester ta contento. Mester duna e piscadonan e balor cu nan merece pa e trabao y e riesgonan. No bay sinta debati prijs cu un piscado cu a cab'i yega di pisca despues di oranan largo den solo, bati di biento, etc. Tene consideracion cu esey, asina Byron Boekhoudt a finalisa.
{gallery}Seguridad prome, respeta lama, prepara bo mes{/gallery}
