DIARIO ta cumpli cu su deber periodistico cu denuncia di e peliger
- Cambio di clima y temporada 2024 feroz ta exigi un team capacita
- Deber di Gobierno y Parlamento pa garantisa defensa natural di Aruba
ORANJESTAD (AAN) Na varios ocasion ultimo tempo, DIARIO como e matutino di Aruba, a duna contenido na uno di su responsabilidadnan mas grandi, cu ta investiga y guia na nivel periodistico e desaroyonan na Servicio Meteorologico.
E prueba mas grandi pa e preocupacion di DIARIO pa e forma cu contenido ta wordo duna na e responsabilidad cu Aruba como pais tin ariba tereno meteorogico, a manifesta su mes durante e temporada di horcan 2023, ora un tormenta cu no a sigui cana den e direccion proyecta, a bay contra espectativanan cu segun e condicionnan presente den e area di Aruba, por a cambia.
E cambio den e ruta di e tormenta a haci cu Aruba a wordo soprende pa e sistema cu, manera fotonan di satelite y radar tabata indica claramente, a zak for di Noord pa alcansa Aruba, causando daño enorme.
Sinembargo, Aruba a scapa di desastre total cu bientonan fuerte, mal tempo y yobida pisa a bay causa despues na otro partinan di region di Caribe.
Loke a pasa sigur no tabata tin nomber si tene na cuenta cu for di añanan 70, ya meteorologia a drenta un fase cu e tabata tin na su disposicion resultadonan cu mundo cientifico tabata entrega pero tambe posibilidad pa tur cu ta parti di prepara comunidad pa calamidad, por actua instantaneamente a base di nan conocemento di materia.
Kico esaki ta encera, ta bini dilanti cu for di decada 70, Servicio Meteorologico cu e tempo tabata parti di Meteo di Antia, tabata conta cu un profesional na nivel mas halto internacional, cu ta Arthur Dania, kende su nomber a drenta historia como e prome nomber di homber cu a wordo duna na un tormenta (Arthur) pa honra e forma cu tabata atende cu Antia y Aruba riba tereno di tempo, cu ta decisivo pa bida di hende pero tambe pa bienestar di un pais riba tur tereno.
Productora di e articulo aki pa DIARIO awe, cu e tempo na añanan 70 tambe a haci su entrada como Hefe di Redaccion na Antia Hulandes, mester a sigui curso di informacion basico pa por atende cu situacionnan di clima y asina di tempo, cu por destrui un pais pio cu guera den un seconde.
E cuadro di importancia di Servicio Meteorologico, cu mester vigila cada nubia cu ta desaroya na cielo y haci uzo di analisisnan, investigacionnan, tur herment cu ciencia a entrega e sector aki, a keda estableci y a bira e motibo cu continuamente ta emiti boletinnan di tempo pa informa comunidad y evita desesperacion, morto y destruccion di bida normal y economia na un pais.
E cooperacion mundial di servicionan meteorologico ta haci posibel cu anualmente bida di Miyones di hende ta scapa di morto y destruccion pero tambe di tragedianan cu barco, avion y tur loke ta transportacion cu ta sumamente importante pa Aruba, cu ta biba di turismo y asina ta responsabel pa e bienestar di e turista.
Informacionnan cu ta sigui drenta, no ta duna muestra di solucion na e Departamento Meteorologico na Aruba, cu a ricibi di naturaleza varios prueba di peliger cu condicionnan di tempo ta representa pa e pais.
Investigacionnan di DIARIO ta duna prueba, cu hustamente awor cu cambio di clima lo percura pa mas y miho horcan, manera ya ta keda proba, tanto Gobierno como Parlamento di Aruba mester tuma e pasonan necesario pa garantisa, cu ta actua debidamente na Departamento Meteorologico di Aruba.
Expertonan riba nan tereno na nivel internacional, atrobe mester wordo busca manera den pasado pa garantisa cu Aruba tin e personal necesario, cu ta ricibi e base asistencia pa aumenta nan capacidad profesional, pa por preveni peligronan grandi cu ta aumenta sigur cu cambio di clima.
Na 2024 ainda e temporada di horcan, cu lo supera tur otro segun expertonan, no a manifesta su mes y por spera cu mientras Oceano Atlantico ta sigui calenta, September por trece un cadena di actividad cu peligro pa henter e region Atlantico di horcan, di cual Aruba ta forma parti.
E Ministro encarga cu Departamento Meteorologico di Aruba, en coopertacion cu un task force di Parlamento di Aruba, mester garantisa, cu Departamento Meteorologico di Aruba tin e capacidad pa atende cu e peligro grandi cu e temporada di horcan 2024 ta encera.
DIARIO mester bisa cu semper e tabata tin bon servicio di tur cu ta forma parti di Servicio Meteorologico a base di cooperacion extraordinario profesional for di nacemento di DIARIO.
Sinembargo, pa un bon funcionamento, mester di organisacion, regla, ampliacion di conocemento a base di ampliacion di conocemento profesional continuo y guia adecuado na tur momento.
En corto, e structura di Departamento Meteorologico riba tur tereno pa garantisa cu e por scapa bida y bienestar di comunidad, mester haya e atencion debido y Parlamento tambe mester presta atencion na un asunto di bida y morto pa e ciudadano di Aruba, e turistanan cu ta bishita Aruba, tur participante den sectornan comercial y di trahador incluyendo miembronan di Gobierno y Parlamento.
DIARIO lo sigui informa Aruba debidamente na interes di personal di Meteo tambe, cu ora baca hoga na poz ta wordo acusa pa tur resultado di falta di accion gubernamental y di Parlamento!
