Caso Avestruz ta exigi Parlamento kita disfraz di sistema electoral
*Partido politico ta bay eleccion pero Ministro ta cabez di Ministerio
*Caso Avestruz ta divulga con un Prome Ministro por sconde den scandal
ORANJESTAD(AAN)—DIARIO a tene duro na e thesis cu leynan cu ta regla gobernacion di Aruba, mester wordo tene na consideracion ora un gobernante of ex gobernante mester aparece dilanti Huez, como acusado den un caso di corupcion.
Mientras Huez, manera DIARIO lo mustra den otro articulo, ta haci e trabou cu Parlamento for di 2013 mester a haci, detayenan importante ta bini dilanti den e forma cu Benny Sevinger como araña lo a cana den un neishi den cual personanan yega na e partido AVP, lo a wordo privilegia den tempo record cu otorgamento di terenonan sumamente costoso, cu cual hasta lo a haci bon negoshi.
Ningun momento e partido di e acusado ta bini dilanti aunke den e caso Avestruz mester papia di fiesta di amigonan y simpatisantenan di AVP, si e acusacionnan ta berdad.
Mientras Pueblo ta tuma nota di loke a bini dilanti den Sala di Corte, DIARIO mester a realisa investigacionnan tras di cortina pa asina topa cu realidadnan cu ta duna prueba di situacionnan inaceptabel y completamente desaconoci pa e gran mayoria di votador di Aruba.
Den e sistema electoral di Aruba, manera DIARIO a insisti for di e prome momento, un partido ta presenta su cantidatonan.
Den e caso di Benny Sevinger, mester papia di un representante directo di AVP cu ta asina valioso pa e partido, cu for di su salida e tabata tin un puesto central den e partido, cu a nombre como Ministro.
Ta como Ministro di AVP, cu dor di e charisma (e atraccion politico) di Mike Eman a haya un cantidad grandi di voto a base di e wega cu reduccion di BBO cu mitar, Benny Sevinger por a otorga tereno na un forma discutibel, cu awe ta motibo cu e ta dilanti Huez en espera di un sentencia cu lo dicidi si e ta culpabel of inocente.
Baluartenan di partido AVP a ricibi tereno (segun acusacion oficial contra ley) cerca Benny Sevinger den tempo record, cu hasta a causa malcontento den seno di partido AVP.
Den henter e proceso no ta scucha nomber di Mike Eman como lider di e partido cu haci Benny Sevinger su candidato pa Parlamento na 2009 y despues Ministro di Gabinetenan di Mike Eman, e persona cu a haya voto pa su partido y asina tin e deber moral pa tanto den su partido como den Gobierno vigila e bienestar di Aruba.
Pakico Huez mes no a scucha Mike Eman?
Ley ta haci cu Huez no por tene Mike Eman responsabel pa loke Benny Sevinger a haci como Ministro y e paranda segun acusacion, cu tabata tin den AVP cu tereno di Pueblo.
Ley textualmente ta splica cu e pais ta wordo goberna diariamente dor di un Conseho di Ministro, dirigi dor di un Ministro Presidente (Prome Ministro), cu ta presidente di e Conseho di Ministro.
Pero cada Ministro ta dicidi riba su mes kico e ta haci den su Ministerio y (manera Ley ta trece dilanti) ta cabezante politico di su propio Ministerio.
E Ministronan hunto ta papia riba cierto decisionnan, loke por resulta den un decision di Gabinete.
Pues tin decision Ministerial cu ta wordo discuti den Gabinete pero aparentemente entrega di tereno di Gobierno (na forma cu ta parce preferencial), na amigonan di AVP, aparentemente nunca a wordo discuti entre Gobierno di AVP, cu a goberna sin partner di coalicion a base di un 12-8 cu a ripiti na 2009 cu e promesa di mitar BBO, cu cual a destrui e base financiero di Aruba tambe.
Aruba tabata den un desastre politico na 2013, cu a wordo scondi pa Pueblo mientras terenonan tabata wordo otorga dor di Benny Sevinger na baluartenan di AVP, sin cu aparentemente otro Ministronan y Prome Ministro Mike Eman a discuti esaki den Conseho di Ministro cu Benny Sevinger.
Mester bisa cu informacionnan cu ta alcansa DIARIO ta mustra, cu peticion pa tereno dor di Arubianonan sin placa, y promesanan cu a wordo haci, lo tabata uno di e motibonan cu Mike Eman a haya voto cu a permiti AVP haci Benny Sevinger su Ministro encarga cu tereno.
E sistema gubernamental di Aruba ta haci cu oficialmente no por puntra Mike Eman como Prome Ministro kico a pasa cu terenonan di Aruba pasobra, aunke Mike Eman tabata percura pa voto drenta, cada Ministro (pa ley) ta cabezante di su Ministerio, aunke den e caso di AVP nan tabata hasta miembro di Partido y amigo intimo den bida personal.
Caso Avestruz ta entrega prueba na Aruba, cu e sistema electoral y gubernamental tin buraconan cu ta permiti situacionnan increibel.Ta e sistema di gobernacion di Aruba a haci, cu Benny Sevinger por a tuma decisionnan sin Landsbesluit, cu mester di firma di Gobernador y tambe di Parlamento, cu mayoria di AVP e tempo cu nunca a puntra Benny Sevinger pa e maneho cu e tabata hiba den otorgamento di tereno, cu Mike Eman como Prome Ministro lo no a considera necesario pa discuti cu Benny durante encuentro di Ministronan.
DIARIO lo sigui informa Aruba!
