Cambio di clima mester ta topico na entrada di temporada di horcan --- *E cambio den manifestacionnan natural ta e motibo di alarma --- *Menos awa den dam pero tambe mas chens di inundacion rapido
ORANJESTAD (AAN) — Condicionnan di tempo na Aruba a cambia.
Na Aruba tabata papia di dos temporada di yobida.
E candelanan di San Juan tabata mustra con e Arubiano a percura pa limpiesa di su cunuco y preparacion pa ora yobidanan presenta pa motibo di pasashinan di horcan den vecindario di Aruba y e posibilidad pa activacion di e Zona di Convergencia Intertropical cu ta bini ariba for di Venezuela.
Den e temporada aki e cantidad di yobida cu strena y lamber, biento fuerte, ta keda registra.
Na November, otro tipo di yobida tabata anuncia su mes na e region. E frentenan friu cu ta baha for di Continente Mericano y ta biaha den direccion Oost, tabata percura pa e yobidanan di Noord Oost Passaat.
Esaki tabata bira e segundo tempo di yobida, cu tabata e momento grandi cu naturalesa tabata entrega agricultornan pa produci cosecha.
Poco poco por nota, cu e situacion a cuminsa cambia.
E situacion lo sigui cambia y esaki ta haci cu Aruba lo mester realisa cu den e tempo nos dilanti e chens pa haya condicionnan di tempo mas severo, ta aumenta.
Den futuro yobidanan produci pa nubianan cu ta crece riba lama Caribe mucho mas cayente, ta bay mas halto.
Mas un nubia crece, mas chens e tin pa produci awacero pisa cu por causa inundacion.
Aki pues Aruba ta confronta situacionnan nobo,.
Continuamente por a mira imagennan bunita di damnan na Aruba, cu ta mustra cu no tin e yobida necesario pa nan yena.
Sinembargo, yobidanan serio y hopi pisa por presenta cualkier momento y inunda cas y propiedadan cu no a prepara nan mes debidamente pa e temporada di horcan, cu por conoce dianan di condicionnan di tempo pisa pa Aruba cu mester prepara su mes.
DIARIO na 2022 cu mas informacion cu nunca, lo guia Aruba, cu si mester cuminsa tene na consideracion cu mester claba dak. Evita cu caminda pa awa bay lama ta wordo blokea.
Ta bon pa den barionan cuminsa atende cu otro manera nos lo splica den mas articulo riba e tema aki.
