||| Nan no kier bay haci e trabao di cobranza
*Nan ta bay haci hopi gasto di busca extra personal pa cobra e placa *Nan ta propone pa pashentnan bay paga AZV directo prome
ORANJESTAD (AAN): Esnan den sector di cuido di salud na Aruba, ta preocupa ta con e sistema ta hinca den otro pa bay introduci e sistema di Contribucion Propio na April 2022, segun deseo di Gobierno y di AZV.
Pero den fin di siman, un carta largo manda pa tanto Conseho di Ministro, Parlamento, y Uitvoeringorgaan di AZV, ta bati alarma cu ta hopi problema logistico e idea di ‘eigen bijdrage’ aki lo trece cune.
Nan tin preocupacion grandi y hopi pregunta keto bay ta colga den aire ta kico lo bay pasa. E sector di cuido, cu ta consisti di Docternan, Specialistanan, Boticanan, Enfermeronan, FSMA Repaldo, ImSan, Laboratorionan, etc., ta pensando cu ni Gobierno ni AZV no a pensa riba e embergadura di nan idea di cuminza cobra cada pashent un suma extra ora di bay Docter, ora di bay Specialista, ora di bay Terapia, ora di busca Remedi, ora di bay Laboratorio, etc.
No asumi robez, esta cu esnan den Sector di Cuido cu gusto lo pensa hunto pa mantene e sistema di AZV keda existi na un forma pagable pa tur hende. Nan ta lamenta si cu no a double-check prome cu e sector aki prome cu a dicidi na bin cu e idea di introduci ‘contribucion propio’. Pasobra nan lo a haya chens di splica Gobierno cu esaki lo por trece hopi incertidumbre y inquietud.
Nan ta convenci cu ora cu AZV introduci e sistema aki, cu e lo no cumpli cu su meta di bay spaar placa, pasobra ta net lo contrario lo socede, esta cu lo bay tin mas gasto pa tur Docter, Specialista, etc., busca extra trahador y crea un extra administracion pa por maneha e costo y riesgonan financiero extra aki pa pueblo di Aruba.
Pesey den e carta, nan a pone un serie di pregunta cu nan ta desea pa haya un contesta riba dje den dos siman di tempo. Pero ya caba nan ta bisa cu como esnan den Sector di Cuido, nan no ta nada di acuerdo pa nan ta esnan cu ta bay cobra e ‘contribucion propio’ aki entrante 1 April 2022. Nan tin di bay busca Cash Register, Swipe-POS Machine, Caha Fuerte, Security, etc.
Nan ta hasta propone pa pashentnan mes bay paga prome na AZV, pa despues pasa bishita Docter. Of kizas introduci un sistema di ‘Top Up’ cu un app di AZV cu ta paga. Of kizas un sistema unda pueblo por pone un cierto suma riba e app di AZV pa asina por desconta esaki den cada bishita.
Den DIARIO di awe ta aparece algun di e preocupacionnan cu sigur ta pone hende pensa cu si di berdad e idea aki di eigen bijdrage lo bay yuda baha gasto of no.
