Enfoke ta riba gobernacion, siguridad y desaroyo economico
ORANJESTAD (AAN): Eric van der Burg, secretario di estado di Asuntonan Interno y Relacionnan den Reino, di 7 te cu 17 di april, ta bishita e seis islanan Caribense di Reino. Sucesivamente e ta bishita St. Eustatius, Saba, St. Maarten, Aruba, Curaçao y Bonaire. Temanan cu lo ser trata durante e bishita di introduccion di e secretario di estado ta entre otro, gobernacion eficaz, siguridad, resistencia economico, colaboracion den Reino y siguridad di cuminda.
Durante su bishita e secretario di estado lo cera conoci mas di acerca cu entre otro gobernante- y representantenan di pueblo. Ademas e ta bishita diferente proyecto, incluyendo construccion di e haf nobo Black Rock na Saba, e preparacionnan pa celebracion di 250 aña di First Salute na St. Eustatius y proyectonan den cuadro di trabaonan di reconstruccion despues di horcan Irma na St. Maarten. Tambe e ta combersa cu representantenan di organizacionnan social na Curaçao y e Comite di Conmemoracion Pasado di Sclavitud.
Na Aruba e ta haya un tour na entre otro Sunny Greenz, un empresario agricultor hoben.
Na Bonaire e ta bishita e dump di Selibon na Lagun y e ta papia cu e habitantenan den bisindario.
Durante su bishita na Aruba, secretario di estado Van der Burg ta participa na e ‘LGO-EU Forum’. Esaki ta un plataforma internacional pa dialogo entre Union Europeo y e Pais- y Teritorionan Ultramar (LGO).
E evento aki ta trece esnan responsabel pa maneho, diplomatico- y academiconan di e area Caribense, Ocean Pacifico, Ocean Indio y region Antartico hunto. E conferencia ta enfoca riba colaboracion strategico riba tereno di crecemento economico duradero, estado di derecho, adaptacion climatologico y transformacion digital.
