ORANJESTAD (AAN): Secretaria di Estado pa Relacionnan di Reino kier crea espacio pa paisnan den reino elimina e reduccion di salario di 12.6%.
E reduccion di salario a worde introduci na mitar di 2020 pa motibo di e pandemia di Corona simbolisando solidaridad na e mercado y tabata tambe un esfuerzo pa baha gasto di e gobiernonan.
Awor cu e gastonan di bida diario ta sigui subi a bira tempo pa reevalua e 12.6%, e Secretaria di Estado ta expresa.
Secretaria di Estado Van Huffelen riba esaki a bisa: “E ultimo periodo e gastonan di bida a subi drasticamente, entre otro pa motibo di e guera na Ucrania. Hopi hende ta lucha cu e gastonan di comestibel y huur.”
“Mas importante ainda ta e hecho cu e economia ta recuperando back y cual ta haci cu e exigencia pa reduci salario cu 12.6% no tin mesun peso mas compara cu e aumento di costo di bida. Cu esaki tambe a bira mas dificil pa atrae empleadonan nobo, mientras ta importante pa tin bon empleado. Cu esaki mi kier duna mandatarionan espacio pa riba nan mesun tempo elimina e 12.6%.”
E exigencia mas importante pa elimina e 12.6% di reduccion di salario ta pa segun palabracionnan haci anteriormente, realisa un limite riba salarionan top y e reduccion riba salarionan di politiconan ta keda vigente.
E eliminacion di e 12.6% lo worde discuti durante e rijksministerraad di Diaranson 25 di Mei venidero.
Secretaria di Estado Alexandra van Huffelen pa Relacionnan di Reino lo ta di bishita na e parti Caribense di Reino Hulandes e siman benidero. For di dialuna 23 di mei pa diabierna 27 di mei e lo ta bishitando Aruba, Curacao y Sint Maarten pa topa cu habitantenan, empresarionan, voluntarionan y organizacionnan social, combersando cu nan riba e topiconan di nan metanan y preocupacionnan.
