ORANJESTAD (AAN) – Parlamentario Setty Christiaans-Yarzagaray, ken a trata e tema di Desaroyo Sostenible y su 17 metanan,
den conferencia di prensa di fraccion di MEP, a amplia tocante e lenguahe di SDG’s, cu ta un punto cu el a agrega.
Christiaans- Yarzagaray a indica cu unda cu e parlamentarionan bay, sea reunionnan interparlamentario, Parlatino, diferente comision cu nan ta asisti no solamente na Aruba pero tambe internacionalmente, tin un lenguahe di SDGs.
“Si nos no papia e lenguahe aki anto e ora ey nos no por papia un lenguahe mundial y nos ta keda atras” Setty a acentua.
E parlamentario a menciona cu na aña 2018, e mes a institui den Parlamento un comision extraordinario di Desaroyo Sostenible, pa asina por yuda no solamente e comunidad, pero den Parlamento mes tambe, construi e forma di educa nan mes, y yega na informacion di kico ta SDG’s y kico Aruba ta haciendo y con nan ta yegando na esaki.
E parlamentario a splica tambe cu e ultimo tempo cu el a traha na CBS, nan mes a traha e indicadornan pa midi e desaroyo, kiermen e progreso di desaroyo sostenible na Aruba. El a comenta cu no ta indicadornan cu nan a detemina, sino cu ta indicadornan cu internacionalmente ta wordo sigui. Ta 169 tipo di indicador cu internacionalmente ta wordo sosteni, y CBS tabata tin e tarea e tempo ey di wak kico ta e indicadornan aki, te na unda Aruba ta y kico falta pa wordo logra.
El a agrega cu den e caso aki, e Departamento di Asuntonan Economico nan ta parti di e Comision cu tin cu duna direccion. Christiaans-Yarzagaray a añadi di cada biaha cu e Departamento y e comisionnan ta organiza, tin un grupo grandi di hende cu ta bin. El a acentia cu no solamente sectornan publico, priva y academico, pero full Aruba.
E parlamentario a agrega cu eigenlijk SDG’s mester wordo carga tambe pa sector priva, pasobra e metanan cu tin no ta logra nan cu sector publico of academico so.
“Awo, si e comunidad riba su mes falta informacion, den esey parlamento tin un rol di concientizacion y pesey e ta papia hopi di dje pa purba informa pueblo. Berdad ta cu por ta dificil pa compronde kico e ta; e no ta asina facil, nos sa esey. E ta un ‘framework’ di 17 meta cu asina hopi indicador cu nos ta yama nan ‘target’ pa yega na dje, cu ta hacie asina dificil. Pero, si nos por compronde e 17 metanan y e cinco pilarnan cu nos ta traha riba dje, ta importante”, e Parlamentario a señala.
Di su parti e ta keda educa, informa y concientiza comunidad tocante esaki. Un punto hopi importante, pakico SDG’s a bin, ta cu mundo di data ta poderoso y tur kier sa kico ta bay pasa. Tur hende ta desea pa tin un bola di cristal, el a subraya, pero informacion por bisa cierto cosnan caba, kico lo pasa den futuro. El a splica cu na e nivel di e direccion cu e crecemento di e poblacion mundial ta bayendo, e Departamento di Nacionnan Uni por midi na ki momento den futuro e cantidad di hende na mundo ta mas hopi cu e produccion di cuminda.
“Ta yega un momento cu e produccion di cuminda no ta suficiente pa a capara e poblacion” Parlamentario Setty Christiaans-Yarzagaray a remarca.
