ORANJESTAD (AAN): Anualmente e movemento scout ta celebra y conmemora Dia di San Jorge (Sint Joris Dag). Esaki ta tuma lugar riba 23 di april. Normalmente Scouting
Aruba lo tene un evento grandi pa celebra e dia grandi aki den e mundo di scouting, caminda lo conta cu participacion di 500 miembro mas nan mayornan y famia, pero lamentablemente esaki no ta posibel den e situacion actual di nos mundo y pais Aruba. Den e cuadro aki nan celebracion lo ta uno diferente, pa cada scout y cada grupo individualmente.
Riba e dia aki ta recorda e gran guerero cu a bringa contra maldad y persecucion di ciudadanonan inocente pa motibo di nan fe y creencia. Tambe ta uza e moraleha di e leyenda caminda cu San Jorge a mata e dragon caminda ta educa e scoutnan pa semper lucha pa locual ta bon. Semper pone bo dilanti pa ta honesto, responsabel, noble, cumpli cu bo debernan civico y tene bo mes na compromisonan haci den tur cos cu bo dicidi pa haci.
Nan fundador di scouting a scoge San Jorge como e patrono di tur scout meramente door di e caracteristicanan ariba menciona. Esaki ta hustamente loke nan fundador a mira como lo necesario pa tur scout pone bista riba dje. Pa nunca rindi den bida, pone bo metanan bo dilanti y bay pa nan, yuda bo prohimo, haci lo corecto y semper cu confiansa lo bo logra bo metanan. Riba dia di San Jorge tur como scout esta: Bever, Welp, Verkenner, Explorer, Voortrekker, Lider, Colaborador, Comisario y Dirigentenan Institutional ta renoba e promesa haci dia nan a instala y tuma e compromiso pa crea un mundo miho, cu paz y husticia. Conforme nan tradicion, ta duna un tarea di dia na tur miembro di Scouting Aruba riba dia di San Jorge. E tarea e aña aki ta hopi simpel: Ban proteha otro lo mas posibel contra e enemigo invisibel cu yama Covid-19.
