*Scolnan cu ta resorta bao di SKOA a pospone te cu proximo aviso
ORANJESTAD (AAN): Durante conferencia di prensa pa duna un update di casonan di Covid-19, Prome Minister Evelyn Wever-Croes a indica cu actualmente tin 590 caso activo y average di contagio pa dia a baha, pero e situacion ainda ta critico.
E situacion en general ta bao control y cantidad di persona vacuna a aumenta 1000 pa siman. Pero den luna di Augustus, 46 persona a perde nan bataya contra Covid. Mayoria no ta vacuna y esnan vacuna tabatin condicionnan preexistente.
Apesar cu Prome Minister a indica cu scol ta habri awe, scolnan cu ta resorta bao di SKOA a manda un carta na unda nan a indica cu apertura di scol ta keda posponi te cu un proximo aviso, mientras nan ta warda resolucion di algun aspecto esencial relaciona cu trahadornan di limpiesa.
Prome Minister a desea tur studiante, maestro y mayornan exito den siguiente aña escolar.
