Vanessa Croes, fundador:
ORANJESTAD (AAN) Den entrevista cu Juffrouw Vanessa Croes, Fundador di Stichting “Scol Amplio Nos Cosecha”, ken a indica cu su directiva tin 18 aña largo na unda cu cada aña ta bin y trece innovacion pa loke ta enseñanza na Aruba.
Esaki kiermen cu e Scol tin 18 aña di existencia, na unda cu nan ta brinda enseñanza y cuido den diferente seccion.
Vanessa a menciona cu nan tin Seccion di Baby, pa muchanan di 0-2 aña. Nan ta wordo prepara den forma di wega p’asina nan desaroya na e maximo.
Nan ta conta tambe cu scol preparatorio pa mucha di 4-6 aña, ademas scol basico cu ta consisti di enseñanza primario y tambe cada seccion di scol preparatorio y basico ta conta cu su parti di Traimerdia.
Vanessa a splica cu e nomber “Amplia Nos Cosecha” a sali di profundo di nan curazon, na momento cu nan a sondea, pa motibo cu nan ta kere cu nos ta cosecha loke nos planta.
“Pues, si nos planta un bon enseñanza, un enseñanza di calidad, cu ta yena e necesidad di e alumnonan na Aruba, nos ta cosecha un bon ciudadano, den tur sentido.
“Por ehemplo, si nos ta planta amor, nos ta cosecha amor, si nos ta planta muchanan cu tin habilidadnan riba e area artistico, nos ta cosecha artistanan. Y esey, den cada area di formacion cu nos ofrece, e nomber aki ta resalta den tur area”, Vanessa Croes a subraya.
El a duna di conoce cu lema di e scol ta “Desaroyo continuo pa cada mucha” y esey nan ta pone como enfasis, cu un no mag stop di desaroya.
“Pues, nos ta kere cu tur mucha tin derecho riba desaroyo, y esey ta locual nos ta brinda. Nos ta mira cu nos muchanan cu gozo, cu alegria, ta siña, ta bira independiente, ta pone tur nan talentonan den practica, y esey ta locual ta haci nos contento tambe”, Juffrouw Vanessa a expresa.
“Den locual cu nos ta haci nos ta sigui e desaroyo di e mucha, a base di e siete areanan cu nos ta ofrece. Y nos ta duna e mucha formacion artistico, nos ta culmina e aña escolar cu presentacion pa tur e mayornan y pueblo di Aruba; kiermen, eynan ta bay demostra tur locual cu nan ta siña. Pa locual ta e otro areanan, por ehemplo matematica, idioma y comunicacion, y tur e otro areanan cu nos ta ofrece, cada un tin su sistema di evaluacion.
“Por ehempel, pa locual cu nan ta siña den matematica na scol basico, maneho di placa, moneda, biyete, con bo ta cambia e placa. Pa tur esaki, por ehempel, nos ta bay un supermercado na unda cu nan mes ta bay haci e compras pa e persona cu ta cushina pa e scol. Pues, akinan ta maneha e placa, lista di compras, wak si locual cu nan tin na biyete ta yega, si tin mester mas, cambio di placa, pues tur esaki ta e forma concreto y practico, den e contexto real di cu nos ta evalua, y asina wak e progreso di cada alumno”, Juf. Vanessa Croes a duna di conoce.
