ORANJESTAD (AAN) – Diferente consumidor a yama DIARIO, pa señala riba e asunto serio ta sosode riba mercado di tur sorto di producto, pa motibo cu no por trece carga pa Aruba, pa falta di container.
Diasabra ta, pa hopi hende cu no ta traha den fin di siman, un dia ideal pa haci compra den supermercado, fruteria, of busca un of otro producto den botica, como tambe den tienda.
Ta consumidornan cu no a haya den supermercado e fruta y berduranan cu nan ta custumbra pa cumpra, y a dicidi core rond di Aruba puntra den fruterianan, pero tampoco nan tin, y tur a splica nan cu no tin carga di productonan biniendo Aruba, pasobra no tin container.
Un consumidor por a cumpra den un fruteria solamente mitad di un papaya, un awacati cu ainda a resta, y bacoba cu si tin na diferente caminda, y si e siman aki no ta drenta carga nan lo tin scarcedad di berduranan hopi aprecia na Aruba, manera banana hecho y banana berde, batata, entre otro, y fruta manera papaya y mango. Ainda por ofrece apelsina, pero tampoco tin hopi.
A nota den un supermercado grandi cu riba e reki di aroz y sucu tin un gap, manera tambe nan ta cabando, y si esey sosode ora mester importa carni y no tin carga, anto nos consumidornan lo haya nan mes den un problema cu nan alimentacion. Asina un consumidor a comenta.
Den botica tambe, algun producto natural, muy en special un probiotico cu ta sumamente cumpra na Aruba, ningun caminda tin. E ta un probiotico den forma likido, cu ta actua hopi lihe riba, pasobra e ta bringa e bacterianan malo cu hopi diligencia, y ta yuda tanto mucha como adulto y hende mayor, y ta proteha bo di diarea. No tin.
Den ningun botica rond Aruba tine, y e agencia, aparentemente, no sa ki dia por pone bek riba mercado pasobra tin problema cu carga. Danki Dios te awo ta e unico producto cu por a scucha cu tin problema pa importe, pa loke ta remedi natural.
Ohala no sosode cu otro tipo di remedinan esencial pa salud di hopi hende. Den un par di tienda, ora a bay puntra pa cierto articulonan pa dorna cas pa Pasco, no tin variedad, tur articulo ta mustra bieu y mahos, y e cliente a wordo bisa cu peticion pa trece cosnan varia y bunita a wordo haci, pero…tin problema cu carga, y esey ta algo cu DIARIO a bin ta treciendo dilanti pa algun luna caba.
