Covid-19 y prestamo pa Aruba a kita bista di Reino for di tragedia
*Encuesta Parlamentario mester divulga cuanto Arubiano ta victima
*Testament di Gobierno Rutte ta contene persecucion fiscal di inocente
ORANJESTAD(AAN)—DIARIO a priminti Pueblo di Aruba cu e lo bay te na fondo di e actitud Hulandes cu ta crea un imagen inaceptabel di e actual gobernacion di Aruba na momentonan cu Gobierno di Hulanda mes ta den problema serio.
Kico a pasa cu Hulanda? Kico a pasa cu e Pueblo Hulandes y cu Arubianonan cu ta biba na Hulanda, caminda actualmente uno di e scandalnan gubernamental mas grandi den historia di Hulanda ta rementa!
Si sigui debatenan cu ta tuma lugar actualmente den seno politico Hulandes, ta topa cu e asina yama “Toeslagenaffaire”, un escandalo cu a nace a base di persecucion di ciudadanonan inocente, acusa di kier a comete fraude, estafa, cy sumanan cu nan tabata ricibi pa asistencia social manera asistencia pa yudansa na mucha desampara.
Pa sigui henter e scandal, cu DIARIO prome cu eleccionnan 2021 na Hulanda a presenta na Pueblo di Aruba pero cu a bay perdi den e caos cu Covid-19 a causa riba panorama total mundial, mester bay na e desaroyonan politico na Hulanda y na figuranan cu a haci nan entrada na Aruba, cu den tur suceso mundial, no por a profundisa su mes den loke tabata pasa.
DIARIO a mantene cu e actitud di Hulanda versus Aruba no ta aceptabel y hasta ta bay contra Statuut y a mustra continuamente riba realidad Hulandes, cu ta caotico.
Na e momentonan aki na Hulanda, e comision encarga cu e encuesta Parlamentario den e Toeslagenaffaire, ta scucha personanan cu tabata directamente envolvi den abuso di ciudadanonan di Reino, biba na Hulanda, incluso Arubianonan di cual un parti lo a bolbe Aruba den silencio for di momento cu e drama a rementa.
E scandal a rementa den man di Mark Rutte, cu ta di opinion cu e tabata tin razon den e forma cu el a atende cu supuesto fraude den caso di yudansa cu estado ta brinda na personanan cu ta encarga nan mes cu muchanan por ehempel den problema pero tambe otro situacion social.
E servicio di Belasting di Hulanda a cuminsa persigui un grupo basta importante di ciudadano, cu tabata inocente di loke tabata pasa y cu a mira nan felicidad destrui.
Na momentonan aki e encuesta na Hulanda mester permiti realidad subi riba mesa y atende cu e investigacionan serio cu a causa caida di Gobierno Hulandes na 2021.
Manera DIARIO tabata indica e tempo tabata tin problema serio pa forma un Gobierno nobo, cu a sinta na 2022 pero awe ta bay cas prome cu su tempo.
Hulanda ta conoce un eleccion den situacionnan unico debi na e situacion financiero di e pais, cu ta kita atencion tambe for di e investigacion Parlamentario cu ta tuma lugar y den cual Aruba lo bay reconoce sigur un cara cu ta e actual Secretario de Estado Hulandes pa Relacionnan den Reino, Alexandra van Huffelen.
Prome cu el a bira un cara conoci na Aruba como Secretario di Estado encarga cu Relacionnan den Reino, Alexandra van Huffelen tabata Secretario di Estado encarga cu Asuntonan Financiero di Hulanda.
Den e cuadro aki sigur ta bini dilanti den e posicionnan politico actual na Hulanda, cu ta papia di un investigacion Parlamentario contra e papel cu Gobiernonan Mark Rutte a hunga den uno di e situacionnan mas cruel cu por wordo crea contra hende inocente, persigui pa fraude cu placa di Pueblo cu nan no a comete.
Pa colmo den e casonan aki a wordo papia di practica di racismo, di posicionnan discriminatorio y destruccion di e estado di derecho Hulandes.
Lo tin 43 sesion den cual lo scucha personanan den debatenan cu ta wordo transmiti bibo y directo.
E Prome Ministro Hulandes, Mark Rutte, a mustra riba su intencion politico pa evita fraude. DIARIO den proximo edicionnan lo sigui amplia riba e actitud di Prome Ministro Mark Rutte, cu ya na 2020 tabata parti di informacionnan cu DIARIO a entrega na Pueblo di Aruba, cu na e momento no tabata sa cu e persona cu dia Januari 2020 pa Januari 2022 tabata Secretario di Estado Hulandes pa Asuntonan Financiero, tabata Drs. A.C. (Alexandra) van Huffelen actual Secretario Estado pa Relacionnan den Reino entre otro.
Den declaracionnan publico cu el a haci na Hulanda el a admiti cu clientenan no a wordo scucha manera mester ta.
DIARIO en extenso lo mustra riba su posicion den e situacion nobo cu a desaroya y den cual e partidonan cu a participa na e dos ultimo gobiernonan Rutte mester spera cu nan tin hopi pa aclarea.
Van Huffelen a presenta puntonan cu na su parecer no tabata bon regla y cu a permiti uno di e scandalnan mas grandi y mas inhumano den Reino Hulandes, desaroya.
Aruba lo wordo informa debidamente di desaroyonan sumamente serio den seno di Reino Hulandes y cu tin resultado pa ciudadanonan cu ta bini di tur pais den Reino Hulandes.
