ORANJESTAD (AAN): Diadomingo 13 di juni 2021 ta invita debotonan di Mama Maria pa un Santo Rosario cu oracion y canto na e monumento di Inmaculada Curason di Maria na Santa Cruz.
Pa 6’or di atardi ta cuminsa resa Aanto Rosario misterio Glorioso. Ban alegra Mama Maria resando rosario cu E mes a siña nos via tres mucha inocente na Fatima. Ban resa pa e Planeta Mundo cu poco-poco ta birando mas vunerabel, Oceano ta birando mas sushi, ta pisca y coy piscanan chikito no ta duna espacio pa nan procrea, mescos cu cangreu muhe cu ta yen di cabituti, no ta laga nan pro crea, pesey nan ta caba na Aruba.
Temperatura di atmosfera ta bira mas cayente. Nos por yuda! No solamente di piki desperticio di otro, core un auto cu ta usa bateria of usa menos aparato di coriente, tur ta yuda! Oracion ta mas fuerte, no kere cu oracion ta enbano, Hasta den silencio Dios ta scucha bo oracion humilde.
Laga nos sigui resa y transforma como yiunan di Dios, pa tur hende haya bendicion y resa pa esnan cu no conoce balor di naturalesa. Haya den Cristo concemento di Su Creaccion cu t’asina sublime.
Grupo di Oracion “Inmaculada Curason di Maria ta reunie pa 6 or di atardi na e Monumento di Inmaculada Curason di Maria na Sta. Cruz. Ta resa pa 50 min. prome cu Santa Eucaristia di 7 or pm.
Laga nos resa pa muribundonan conoce Cristo den nan ultimo dianan. Resa pa esnan den exterior cu ta anhela nan recuperacion. Tin buki di oracion fl.5.= especial pa resa na e monumento di Inmaculada Curason Maria solamente un bes pa luna. Tur hende ta Bon Bini.
