ORANJESTAD (AAN): Directora di Santa Rosa, Nathalie Maduro a duna di conoce cu ultimamente algun persona a publica riba Facebook cu atrobe a cuminsa lanta cabes e problematica di hortamento di bestia.
El a bisa cu tin basta aña caba cu ta confrontando e situacion aki y Polis ta na altura. Tin algun polis cu tambe ta criado y toch ora cu ta meld esaki cerca Polis nan ta bay wak kico ta e situacion cerca e criadonan.
Ta di compronde cu prijs di cuminda ta subiendo, pero di otro banda si ta wak e otro tres sectornan: agricultura, cria y pesca, e sector di mas vulnerabel y cu tin mas gasto ta esun di criansa. Prijs di cuminda a bira caro, awa no ta yobiendo suficiente pa haya yerba band'i caminda pa chapi.
Santa Rosa ta lamenta hopi cu tin hende cu no ta tene cuenta cu esey. "Semper tin oportunidad. Si bo ta un persona cu ta gusta carn'i cabrito, si bo tin espacio, bo por haya informacion na Santa Rosa pa cuminsa cria di bo mes".
Pero ta lamenta hopi cu esaki ta pasando. E criadornan ta cuminsa yama, e cuminda ta birando hopi caro y tin hopi presion riba nan, a subraya.
E tradicion di laga e bestianan bay come den mondi casi no por mas. Hopi vivienda a wordo traha y tin hopi hende cu no ta compronde cu un cabrito hopi cuminda e mester. Tin bisiñanan cu ta yama indicando cu ta venena e bestianan, kiermen cu e criadonan no tine facil, a indica.
Locual Santa Rosa a cuminsa haci un par di aña caba ta cu nan mes tin nan plantacion di hooi y ta regala e criadonan cu ta interesa, simianan di hooi pa nan mes por planta. E no ta algo cu ta crece di anochi pa mainta, e ta tuma su tempo y ta rekeri basta awa na comienso.
Kisas por uza otro matanan local como alimento cu tin e proteinanan necesario, a agrega.
Tin un persona cu ta yudando Santa Rosa y cu recien a duna un curso mustrando kico ta e alternativanan cu por uza como alimento, pakico ta importante pa haci un plan y pa sa realmente ki cantidad di bestia bo por cria pa no bira un problema despues cu no tin suficiente alimento pa nan y cu tin cu laga nan bay mondi creando asina otro tipo di dolor di cabes manera hortamento, cu cacho of cu hendenan ta venena nan, Nathalie Maduro a splica.
