Randy Maduro, PR di Santa Rosa:
*Pero DLVV no tin suficiente awa di dam
ORANJESTAD (AAN)-- Un temporada di secure semper ta crea consecuencia pa e agricultor y e cuidadornan di bestia. Kizas esnan cu ta pidiendo dos of tres truck di awa, Santa Rosa ta hibando un so pa nan y esey ta trece un poco disgusto tambe pa nan, segun Randy Maduro, kende ta relacionista publico.
“Nos ta compronde esaki, pero nos ta pidi tambe pa tene comprension cu Santa Rosa no tin suficiente awa di dam. Si berdad bo tin un meter di agricultura bay riba esaki purba di mantene bo matanan na bida, catch un of otro awa di wash- machine, of di airco, colecta esakinan p’asina aki bo por muha bo plantacion y mantene asina mientras tanto, pa nos tambe por haya un tiki rosea p’asina cu tin awacero torencial djis laga e damnan por yena”, Randy Maduro a relata.
E situacion aki por minimiza un poco e produccion. “Pero atrobe nos ta haci un apelacion pa esnan cu tin e meter di 12.50 pa agricultura, of esnan cu ta mas comercial, bay riba esaki pa mantene bo matanan toch bibo, p’asina nos wak con nos ta pasa e temporada aki y yega na un awacero torencial pa e damnan por yena atrobe”, Randy Maduro a remarca.
Tambe tin e awanan di pos, cu ta wordo uza pa agricultura, pero aworaki, por ehemplo esun na Savaneta no ta den funcion pasobra tin un situacion cu ainda Santa Rosa no por a keda cla cu esaki. Tambe esun di Pavia no por wordo uza pasobra falta pieza y tur esaki ta den proceso y den algun siman nan lo bay keda cla, principalmente esun di Pavia, p’asina e productornan por bay coi awa, y asina muha nan plantacion. Esun di Noord ta fuera di servicio, mientras cu e dam tambe ta bashi, y e lelinan ta creciendo den dje.
“Nos ta mira cu dentro di poco nos mester haci esaki limpi, pero simplemente e mester ta un tiki mas seco pasobra ainda tin un poco awa y lodo. Nos mester evalua tur e diferente trabaonan Santa Rosa ta bay haci, pa yena na e momento cu esakinan lo tuma lugar. “Mientras tanto uza awa di airco y awa di laba paña colecta esakinan, y si bo tin awa di meter di agricultura, bay riba esaki un rato, percura pa bo tin dry system, pa purba spaar awa un poco mas y asina mantene bo matanan bibo”, Randy Maduro a reitera.
