Ban sera conoci cu Picuda
ORANJESTAD (AAN): Ban papia di nomber di pisca. Bo conoce bo piscanan? Un serie di articulo informativo cu ta ilustra algun pisca y nan nomber na Papiamento den cual Departamento di Agricultura, Cria y Pesca, conoci como Santa Rosa kier comparti y alabes haya informacion for di publico. Lesa na final di articulo con pa haci esaki.
Picuda, Sphyraena barracuda, Greater Barracuda:
Bon conoci ta e picuda, barracuda na ingles. Su nomber cientifico ta Sphyraena barracuda. E ta wordo pisca hopi. E ta henter aña den nos awanan, unda e ta un asina yama "ambush predator" cu ta keda para of flota keda den awa warda su presa bin cerca pa e ataca e ora cu speed di relampago. E ta bon conoci pa comedonan di pisca hasa of su carni blanco den sopi di yambo. Den cultura di piscado tin hopi nomber mas, manera Pecho blanco, Blekito, Banana of Bleki. E nombernan ta varia segun tamaño.
Descripcion:
Picuda ta un pisca largo, curpa rondo manera torpedo y di color platea cu strepi shinishi cu marcanan preto. Parti abou, esta e bariga ta mas blanco, mientras parti pariba ta mas scur. Su piek ta hopi punta y e kaak abou ta mas largo cu esun di ariba. Su peduncle, esta unda e curpa ta topa cu e rabo ta diki, mientras e rabo tambe ta forma un medio luna pero den e caso aki uno mas "yen" cu esun di mulato of conofes. Esaki ta refleha e forma di caseria di e picuda. Esta di mester por sali na un careda rapido ora e presa yega cerca.
Na Aruba:
Picuda por ser haya den nos awanan rond nos isla henter aña largo. Picuda, den nos awanan ta comible sin problema. Picuda tambe ta un pisca hopi busca door di deportista of piscado recreativo paso e ta pone un bon pelea unabes gara. Por garele via slip (trolling) den boto, casting for di tera cu liña of rod of via di jigging, tira e lure (haas falso) y trece esaki aden cu cierto movicion di e rod.
Contacto cu nos:
Ta intencion pa periodicamente Santa Rosa saca mas informacion pa tocante di nomber di pisca na Papiamento. Si bo tin informacion of comentario pa engrandece conocemento of si ta desea informacion of topico specifico pa amplia ariba, por manda esakinan libremente na This email address is being protected from spambots. You need JavaScript enabled to view it..
