Reto pa comunidad en cuadro di Dia Mundial di Diabetes:
ORANJESTAD (AAN) – Den entrevista cu DIARIO, e Dietista di Healthy Lifestyle Center, Sandira Bislip, a duna di conoce cu siete instancia cu tin dietista den servicio, en conexion cu dia 14 di November, cu Dia Mundial di Diabetes, ta uni den un proyecto unda durante siete dia, cu ta di 14 te 20 di November, ta bay reta comunidad di Aruba pa evita consumi productonan cu tin sucu agrega.
Mayoria di biaha e productonan aki ta refresco, juice, cosnan dushi manera bolo, buscuchi dushi, ice-cream, chuculati, cu mayoria di biaha tin sucu agrega. Pero tin biaha tambe tin sous cu ta contene esaki, pero nan ta bay duna na tur persona, un siman prome, esta di 6 te 13 di November, e tools, conocemento, motivacion, pa nan tin tur e hermentnan, pa asina nan por asumi e reto di dia 14 te 20 di November.
“Pasobra mayoria di nos tin un adiccion pa sucu tambe, anto mayoria di biaha esaki ta e added sugar. Pues, no e sucu natural cu, por ehemplo, ta bin den fruta, of berdura. Pero esun cu ta agrega na e producto, pa haci bo adiccion un tiki mas. Y vooral, e meta di e proyecto aki ta pa concientiza e pueblo di Aruba pa reta su mes pa evita e productonan sin sucu agrega , pa asina sinti nos mes hopi miho tambe, por ta hasta logra un peso saludable, mas energia, mente sano, y pa por baha e cantidad di hende cu tin sobrepeso y obesidad, na Aruba”, Sandira Bislip a remarca.
