Tarifanan halto di belasting a sostene bienestar social falso
*Sistema basico socialista di Hulanda a pega den demanda nobo
* 6 di December cu un contenido nobo pa Parlamento Hulandes
ORANJESTAD (AAN) — Dia 5 di December 2023 pa ultimo biaha e constelacion actual di Tweede Kamer Hulandes, lo reuni.
Fiesta di San Nicolas na 2023 lo bira e dia di entrada na un epoca di cambio grandi den mundo politico Hulandes, loke na prome lugar ta bini dilanti den e pronosticonan cu ta wordo haci actualmente di e cantidad di votonan cu partidonan participante na eleccion Hulandes 2023, lo por ricibi.
Un periodo nada facil ta spera e grupo di politiconan, cu pa medio di eleccion lo drenta Tweede Kamer Hulandes, cu ta base pa formacion y direccion di un Gobierno Hulandes, cu lo ta e ingrediente principal di e Gobierno di Reino Hulandes.
Ayera oficialmente, trabounan normal den Tweede Kamer a wordo suspende te despues di eleccion di 22 di november, cu mester dicidi riba e constelacion nobo di Parlamento Hulandes cu mester tuma asiento ariba e dia di fiesta di San Nicolas.
E pronosticonan pa e proximo eleccion Hulandes, ta deshaci di e tendencia basico di ultimo eleccionnan na Hulanda.
Partido VVD di actual Prome Ministro Mark Rutte, a gana ultimo eleccion cu un ventaha di 10 asiento riba e proximo partido y asina a duna un imagen cla di loke e Pueblo Hulandes tabata kier pa su gobernacion.
Pronosticonan actual ta sostene e cambio grandi entre resultadonan di ultimo eleccion y loke por spera cu eleccionnan Hulandes, caminda tres partido ta comparti directamente e chens pa gana eleccion.
Cu nan tres lo uni forsa a base di nan resultado, ta algo cu e votadornan lo por pensa. Nan por dicidi pa traha cu otro partidonan cu den e situacion actual na Hulanda ta crece.
Importante ta cu e partido VVD, aunke e sali ganador cu e actual pronostico, mester papia di un rechazo di parti di Pueblo Hulandes cu realmente tabata e motibo pa cual e partido di Prome Ministro Hulandes Mark Rutte a bati retirada di gobernacion prome cu el a cumpli cu e tempo pa cual el a wordo eligi.
Formacion di e ultimo gobierno di Mark Rutte tabata sumamente dificil y tabata tin e resultado cu e por a spera cu ta un cambio grandi den e constelacion di Tweede Kamer Hulandes, cu a mira un partido manera D’66 na cual e actual Secretario Hulandes pa Relacion den Reino, Alexandra van Huffelen ta pertece, transforma su mes den un partido chikito.
Importante ta bira na e momentonan aki, kende lo ta parti di un coalacion Hulandes cu ta bira base di Reino Hulandes tambe y kico ta e cambionan cu mester spera.
Hulanda ta un pais rico di hasta trahadornan cu un base economico fuerte, cu, a funciona a base di leynan cu ta pertenece mas na socialismo cu na un estado derechista.
Si migracion ta un problema serio pa Hulanda, ta pa motibo cu un pais chikito cu un cantidad di habitante na su midi, ta un gigante economico den historia mundial.
E participacion Hulandes na comercio internacional, ta marca historia mundial.
Ora nos papia di historia, nos ta papia di Shell como un ehempel. Nos ta papia di Hulanda, como puerto di entrada cu barco pa Europa. Europoort, Rotterdam, ta bisa hopi.
Hulanda ta un pais cu ta produci su propio cuminda y tin un sistema di educacion, cu ta atrae studiantenan di tur parti di mundo.
Trahadornan na tur nivel ta wordo importa pa ta parti di e forsa laboral cu mester di cas, e bon salario y areglonan social cu a haci Hulanda un paraiso pa trahador pero un peso pa bon gobernacion.
Hulandesnan ta paga pa e prijs di un Gobierno cu ta regla tur cos pa e habitante Hulandes pa medio di taza halto y primanan enorme pa loke ta entrega Hulanda e status di baluarte social, cu a fracasa pa su peso.
Eleccion 2023 ta pone un fin na un epoca realmente si mira e demanda di e votadornan, cu a causa cambio grandi den e panorama di partidonan politico cu lo participa na eleccion 2023, cu lo ta entrada directamente pa un situacion nobo na 2024 na Hulanda pero tambe pa henter Reino, cu mester di formulanan operacional nobo.
Eleccionnan 2023 di Reino ta exigi di Aruba pa e ta prepara pa atende cu un epoca nobo den Reino, caminda e sistema socialista a faya y hende na forma individual kier mira fruto di su entrega, manera ta e caso cu agricultornan, cu empresanan na peliger pa motibo di belasting y sigur e ciudadano Hulandes cu mester a paga belasting pa otro hende goza di beneficionan pa cual e mester a haci sacrificio y hasta haya imagen di hende pichiri cu no kier gasta placa pa e por economisa mientras su placa ta bay na belasting pa gobernantenan dicidi na forma cu a fracasa.
