ORANJESTAD (AAN) – San Nicolas Business Association a convoca un conferencia di prensa, Diabierna di e siman aki, conduci pa señor Andres Hernandez, presidente di e asociacion.
Den e encuentro aki, SNBA ta mustra cu no ta di acuerdo cu e hecho cu a para, temporalmente, e construccion di Secrets Hotel.
Hernandez a cuminza pa expresa cu e proyecto aki ta e catalizador di e futuro di tur locual ta henter e desaroyo di pariba di brug.
El expresa cu no por lubida cu, pa hopi aña, San Nicolas tin un situacion economico-social dificil, y despues di hopi aña a haya un inversionista cu contra un refineria si of no, contra e bista cu esaki por causa, contra e camindanan cu ta existi pa por yega te unda e proyecto ta ubica. E no ta papiando di e camina principal sino un bez cu sali di eynan pa yega na Colony, unda cu tin un situacion masha grandi, cu falta di 300 empleo pariba di brug. E caso cu algun ciudadano a entama contra e proyecto, SNBA ta considere un atentado contra e desaroyo y e futuro di pariba di brug.
Seguidamente, a pasa palabra pa e Secretario di SNBA Errol de Freitas, ken a señala cu pa SNBA, cu ta un organizacion pa stimula y proteha comercio di San Nicolas y pariba di brug, pero cu tambe durante e añanan a asumi un rol social tambe, pa purba di yuda. Anto despues di tanto aña, pa nan yega na un punto unda cu e refineria ta cera pa hopi aña, y despues cu tabata tin un exodo di famianan cu a bay biba na diferente otro distrito di Aruba, pa por asegura y garantiza nan pan, ta bon pa anota e costo cu ta bay den dje. E transporte, por ehemplo, cu hopi biaha no ta paga tino na dje.
“Despues di e desaroyo cu tabata tin den e refineria, ora nan a bay tur cos a bolter bay na pariba di brug, nos ta weita kico tin eynan. Naturalmente, nos a sinta den nos seno papiando cu diferente organizacionnan y tambe Influencers, y cu nos alianza cu diferente grupo di San Nicolas, nos a bin na e conclusion pa organiza un Cumbre”, de Freitas a comenta.
E Cumbre a tuma lugar cu varios inversionista local y internacional cu a bin Aruba, no tabata tin un gobierno den su totalidad, ni representantenan di parlamento, ni banconan, etc., pa sali afo bisa: “e tempo di San Nicolas ta awo!” El a agrega cu den e Landspakketnan tambe ta bisa cu na Aruba mester tin un balansa.
De Freitas a indica cu e area unda e hotel ta wordo lanta, tabata destina pa un hotel caba cu hasta, incluso nan tabata desaroyando un hotel, pero pa un of otro motibo no a sigui.
“Pero den caso di Secrets nos a haya un grupo serio, cu si a dicidi cu nan kier pone nan confianza, no obstante e situacion nos tabata tin di e refineria, etc. Cu nan si kier yuda. Y nan a bisa nos bon cla tambe cu nan ta honra nos peticion, cu nan no a bin pa desaroya tur cos in-house. Cu nan kier pa nan huespednan bay den e pueblo di San Nicolas y disfruta di locual tin”, De Freitas a agrega.
