Resumen di e temporada di horcan: --- ORANJESTAD (AAN): Ora cu e temporada oficial di horcan ta tras di lomba ta na su lugar pa haci un recuento riba con e temporada aki a bay.
Di e horcannan 2021, tres alcanza categoria 1 den e escala Saffir-Simpson (di 1 - 5), cu bientonan di hasta 95 miya pa ora (152 km/h), dos a yega categoria 3 (hasta 129 mph of 207 km/h) y dos te na categoria 4 cu bientonan di hasta 156 mph (251 km/h).
Di e ciclonnan di 2021, nuebe a toca tera na Merca, unda tabata tin inundacionnan, y otronan a impacta na Cuba, México, Republica Dominicana y Haiti.
Horcan Ida, cu a forma na fin di Augustus, tabata esun cu e impacta Merca cu mas forza, cu 95 morto y dañonan estima den alomenos 65.000 miyon dollar, specialmente na Louisiana, New Jersey y New York.
Aunke e dos ultimo lunanan di e temporada tabata relativamente trankil den lama Atlantico, a uza e 21 nombernan cu e Organizacion Meteorologico Internacional a establece pa denomina e ciclonnan di cada aña.
E meteorologonan a pronostica prome cu e inicio di e temporada (1 di juni) cu e actividad ciclonico lo tabata mayor cu normal, aunke sin yega na e record di 2020, ora cu tabata tin 30 tormenta cu nomber, di cual 14 tabata horcan y mitad di nan di categoria mayor (3, 4 of 5 den escala Saffir-Simpson).
E promedio anual di tormentanan cu nomber den e periodo 1999-2020 tabata di 14, dos mas cu den e periodo di 1981 - 2010.
E prome tormenta di 2021, Ana, a presenta na Mei, antes di e inicio oficial di e temporada, algo cu ta bin ta sosodiendo desde varios aña caba y cu a hiba algun experto na plantea e necesidad di adelanta e comienso, y e ultimo tabata Wanda, forma dia 24 di October na altura di e parti central di e costa atlantico mericano.
E prome horcan di 2021 tabata Elsa, di categoria 1, cu a forma dia 2 di juli y a toca tera na e parti centro-west di Cuba tres dia despues, pa despues sigui su caminda pa e Golfo di México y caba na e Carolinanan y na Massachusetts.
Grace, cu a toca tera na México dia 19 di augustus, tabata e prome horcan mayor di e temporada y a causa un promedio di 14 morto y 513 miyon dollar de den dañonan
Larry, cu a bira horcan dia 2 di september, tabata e promer horcan den toca tera na Terranova (Canada) desde Igor na 2010.
Sam, e di dos y ultimo horcan categoria 4 na 2021, a forma dia 23 di September y semper a keda riba lama.
