Asuntonan clave awor ta haya e accion cu nan merece
*Evolucion mundial ta exigi revision continuo di Cuido Medico
*Bon maneho financiero di AZV sigur importante si e ta obligatorio
ORANJESTAD (AAN) — Ora ta papia di democracia, ta papia na prome lugar di e bienestar di e ser humano cu ta forma comunidad.
Felicidad y bienestar di hende y su comunidad ta depende na prome lugar di e grado di salud di hende.
Durante ultimo dianan, Aruba a wordo presenta cu informacionnan valioso, sigur si tene na consideracion, cu e concepto principal di Cuido Medico na Aruba ta basa riba un concepto, cu ta mishi cu e oportunidad cu un ciudadano tin pa garantisa cu e ta ricibi e cuido medico cu e kier pa garantisa su salud.
Na momento cu Aruba a dicidi pa un Aseguro General cu ta obligatorio y regla pa ley y den man di Gobierno, Aruba a exigi pa un sistema si aseguro general, cu ta kita for di e ciudadano e derecho pa dicidi cuanto placa e kier gasta pa asegura su salud.
Pues na momento cu Aruba a introduci un Aseguro Medico General, el a introduci un sistema, cu segun e concepto di democracia mester asegura cu tur miembro di comunidad ta ricibi un calidad di Cuido Medico, cu por competi cu e mihor cuido medico cu e ciudadano na forma individual lo a haci su escogencia personal.
Introduccion di un Aseguro Medico Obligatorio ta encera, cu ta schrap e posibilidad pa un ciudadano dicidi cuanto placa e kier gasta pa su salud.
Esaki a nifica cu Gobierno tin e obligacion cu e cuido cu Pueblo ta ricibi ta excelente pa asina por competi cu e aseguro priva, cu ta brinda e pakete mas completo pa sostene salud di un persona.
Cu cambionan mundial y e adelanto cu ciencia a conoce, Cuido Medico a conoce necesidad di tratamentonan cu un pais chikito, no por ofrece su poblacion.
Ekiponan sofistica cu ta base di cuido medico actualmente y cu continuamente ta conoce optimalisacion a base di descubrimentonan nobo cu avance ta contene, ta haci cu tratamento adecua di cierto tiponan di enfermedad, no ta financieramente alcansabel pa un poblacion di un pais chikito, cu mester busca asistencia den exterior.
Cientificamente a wordo establece cuanto pashent mester pa por carga e peso di tratamentonan costoso loke sigur ta haci cu pashentnan mester bay exterior pero bou responsabilidad di Gobierno di e pais.
E hecho cu e maneho di Gobierno Evelyn Wever-Croes y na forma special Ministro Dangui Oduber encarga directamente cu e maneho den e Gobierno actual, a produci un saldo favorabel pa e fondo di AZV, ta haci cu Aruba por sostene un bon calidad di cuido medico y asina tambe percura cu si e cuido aki no ta presente na Aruba, e pashentnan por biaha pa exterior pero cu garantianan cu Gobierno mester por brinda.
E avancenan cu Director di AZV, Edwin Jacobs a logra pa garantisa cu placa di Pueblo ta wordo bon uza den e lucha pa bida di e Arubiano, ta basico den e sistema di cuido medico cu Aruba mester por brinda cu centralisacion di e sistema di aseguro.
Importante ta e areglonan pa asegura cu e placa disponibel ta wordo bon uza den exterior ora esaki ta necesario, pero tambe cu Aruba mes ta expande e servicionan medico local, manera siman pasa a bini dilanti den e proyecto nobo di HOED, cu ta pone dokternan di cas bou un dak na Imsan.
E hecho cu AZV a produci un resultado financiero positivo ta entrega prueba cu e base pa un bon maneho medico pues wordo duna a base di conocemento di exigencianan financiero di mundo medico, cu hopi bez cerca publico no ta ricibi e comprension pa gastonan y maneho responsabel dirigi cu esaki ta trece cune.
Esaki a haci cu den pasado construccion di loke mester a bira hospital di cinco strea a stroba Aruba mira e realidad, cu a exigi pa na momento cu e prome Gabinete Evelyn Wever-Croes a tuma asiento, yega na un solucion pa Hospital, alma di cuido medico, cu tabata un calamidad.
Awe e maneho profesional cu Aruba conoce ta di aplaudi semper y cuando e maneho ta sirbi Pueblo a base di e responsabilidad cu cuido medico completamente den man di un aseguro medico, ta exigi den un estado democratico.
