Nicole Hoevertsz di COA:
ORANJESTAD (AAN): Den un entrevista reciente cu DIARIO, Secretario General di Comite Olimpico Arubano, Nicole Hoevertsz, a enfatisa cu salud mental ta un tema actual cu ta haya cada biaha mas atencion den mundo di deporte, tanto internacionalmente como na Aruba.
Segun Hoevertsz, deporte ta un refleho di comunidad. E desafionan emocional y psicologico cu ta afecta personanan den sociedad tambe por afecta atleta, entrenador, dirigente y otro persona involucra den deporte.
El a menciona cu durante e celebracion di Panam Sports na Lima, Peru, e comision di Safe Sport di Panam Sports, presidi pa Hoevertsz, a organisa un forum riba e topico aki na unda tur e 41 Comite Olimpico di ful e continente tabata presente.
E Secretario General di COA a menciona e caso di gimnasta internacional Simone Biles, kende tabata e prome atleta famoso cu a trece e topico aki na claridad net prome cu Weganan Olimpico di Tokyo 2020, cu pa motibo di Covid, a ser celebra na 2021.
Biles a tuma curashi y a bin dilanti y expresa ‘Mi no ta ok’. Mientras cu mundo tabata wak Biles como un atleta famoso cu a gana hopi medaya, e tabata lucha cu su salud mental. Biles durante e weganan na Tokyo a dicidi di retira for di e competencia pa protege su bienestar mental.
Segun Hoevertsz, e decision di un atleta tan conoci y exitoso pa papia abiertamente tocante su salud mental a yuda haci e tema mas visibel, fuerte y mas facil pa discuti.
E desaroyo aki a causa cu organizacionnan deportivo internacional, entre otro Comite Olimpico Internacional, a intensifica nan atencion riba salud mental y bienestar di atleta.
Hoevertsz a splica cu salud mental no mester wordo mira separa for di otro aspecto di proteccion den deporte. Pa e motibo ey, Comite Olimpico Internacional ta trata salud mental huntu cu Safe Sport.
Safe Sport ta enfoca riba crea un ambiente deportivo sigur, respetuoso y liber di acoso, abuso sexual, abuso fisico, abuso psicologico y otro forma di comportamento dañino pa e atleta.
Hoeverts a remarca cu Comite Olimpico Internacional ta duna e guia na e Comitenan Olimpico y den e caso aki, tambe na e Asosiacionnan Continental, den caso di Aruba, Panam Sports.
Ta importante pa atletanan sa, manera Biles, cu nan no mester keda keto ora nan no ta sinti nan mes bon. Organizacionnan deportivo, entrenador y dirigente tin e responsabilidad di crea un ambiente caminda atletanan por papia abiertamente y haya sosten adecuado.
Cu e atencion mundial riba salud mental creciendo, COA tambe ta sigui fortalece su trabao pa promove bienestar, siguridad y proteccion di tur persona cu ta participa den deporte na Aruba.
