Hende ta enfrenta e retonan mas grandi den su historia moderno
*Exigencia democratico entrega na Prensa central pa e ser humano
*October ta habri porta pa sucesonan cu lo defini futuro di hende
ORANJESTAD (AAN) — October 2023 a bati na porta y asina ta splica publico, cu e e ultimo trimester pa yega un aña nobo, ta yega na su fin.
Naturalesa ta splica October como e luna di transicion pa situacionnan diferente. Na Aruba e ta nifica e momento pa atende cu e suela cu mester produci cuminda cu asistencia di yobidanan cu mester alcansa e pais.
Na paisnan manera Merca y Hulanda e ta nifica cu mester cuminsa prepara pa temperaturanan cu ta wordo cualifica como friu y na e otro banda di e globo mundial, e ta nifica cu e tempo di friu a bati na porta.
Na hopi ocasion DIARIO a trece dilanti cu hende no por a mira, con realmente e mester a bandona e tempo di petroleo, e tempo di cambio di generacionnan cu ta despedi y ta drenta.
Covid-19 a bira pa mundo, un aceleracion di metodonan cu mester a asisti hende den e transformacion pa futuro, den cual tur gremio lo hunga un papel sumamente importante, cuminsando cu mayornan cu mester educa mucha pa dirigentenan di un mundo cu ta parce di no por reconoce ni su orbita.
Cu entrada pa October 2023, prensa na Aruba y henter mundo, mester asumi e responsabilidad grandi como e fuente di informacion di hende cu ta drenta un futuro, marca pa hopi desaroyo cu ta resultado di asuntonan cu hende hopi bez no kier a mira ni comprende, pero awor hende lo mester acepta como su responsabilidad si kier duna continuacion na democracia, na e bienestar di hende cu ta tarea di hende.
Pa drenta October, cu ta nifica cu ya e ultimo parti di calendario 2023 no ta completo mas y ta no ta resta ni tres luna mas di 2023, mester tira un vista riba sucesonan y desaroyonan importante cu lo ta decisivo pa e comunidad mundial.
Naturalmente mester tene duro na tradicionnan nacional, cu lo haci e exigencianan pa salida di 2023 pa 2024 alegre y asina duna animo pa sigui dilanti.
Reto no ta carga pero reto ta hustamente e creacion di un balansa cu ta permiti hende atende cu su responsabilidad y asina sigura un bon futuro.
Kico ta e pakete local cu Aruba mester hiba futuro?
Un responsabilidad pa un Status Aparte real den cual no solamente Aruba ta lucha pa autonomia politico den Reino, pero pa un autonomia cu ta sirbi e Arubiano cu su cultura, su tradicion, su mentalidad, su forsa pa sigui lucha pa progreso nacional y personal.
Aruba lo mester enfrenta desaroyonan mundial den cual central lo ta e cambionan di naturalesa cu ta dicidi directamente pa hende, como parti y dirigente di naturalesa.
Costumbernan mester cambia pa asina demostra responsabilidad enfrente e produccion di cuminda y tur loke nos mester pa sobrevivi.
Aruba lo mester enfrenta cambio di clima cu lo nifica cu mester ahusta na un mundo den cual nos casnan lo mester adapta nan mes na realidad.
Nos mester regresa na e momento cu nos ta traha tanki y dam pa warda awa na tur forma.
Cuminda, cu tabata resulta den baki di sushi, awor mester wordo respeta. Nos pan di cada dia y su produccion cu nos trabou, mester haya valor nobo.
Respet di hende pa hende y un concenshi mundial nobo mester bira realidad.
Na e momentonan aki nos ta mira problema na tur parti di mundo, cu ta e cas cu nos a destrui no solamente pa loke ta trata clima, pero tambe pa normanan.
Na e momentonan aki Reino Hulandes ta prepara pa cambionan, cu lo ta parti di e gobernacion nobo di Hulanda cu prome cu fin di 2023, lo haya mando di Gobierno di Reino tambe.
Nos ta mira mundo politico di Merca enfrenta situacionnan cu hopi hende no tabata sa cu ta existi. Casi a surgi problema cu ciere di e cranchi financiero debi na e hecho cu leynan cu mester a atende pa e maneho financiero di e pais, no a pasa.
A surgi problema den representacion politico di e pais y por a mira con a atende cu retiro di e dirigente di e Cas di Representantenan cu a crea otro situacion dificil na e pais.
Siman ta habri cu den porta di Aruba, Oposicion na Venezuela prepara pa su eleccionnan primaria na caminda pa eleccionnan presidencial cu lo crea basta problema na 2024 ora Nicolas Maduro lo trata di keda na poder.
Problemanan den nos region cu ta produci refugiadonan social ta continua y merece atencion di tur ciudadano, cu ta bon informa pa asina por duna contenido na e bienestar di Aruba.
Cu entrada di October portanan ta habrui pa fin di 2023 pa drenta 2024 cu ta exigi pa uno y tur carga nan responsabilidad na bienestar di Aruba y di mundo y asina realisa felicidad di hende!
