ST. GEORGE’S: E compania Sagicor ta dunando un man na e dos islanan cu a wordo devasta pa Horcan Beryl recien, na Grenada.
Nan a caba di anuncia cu nan ta bay yuda cu un contribucion financiero, pa cumpra Generator y luznan di caya Solar, pa tanto Carriacou y tambe Petite Martinique na Grenada, y tambe e isla di Union Island cu a ser afecta na St. Vincent and the Grenadines.
Robert Trestrail, kende ta Group President y CEO di Sagicor Life Inc., a duna e detaye aki awor cu varios yudansa a cuminza mobiliza na Grenada y St. Vincent pa e ciudadanonan cu ainda ta sufriendo.
Ehecutivonan di Sagicor ta na e isla pa asina tuma prome pasonan, yudando cu e.o. cargamento di awa den boter, cuminda den bleki, pa sostene esfuerzonan pa yuda esnan afecta. Den combersacion cu oficialnan, a bin nota cu nan prome prioridad aworaki ta cu no tin coriente na e islanan aki, y pesey awor e compania ta enfocando nan esfuerzo pa busca generators.
