ORANJESTAD (AAN): E aña aki Sagicor Life Aruba a cumpli na Mei su di 35 aniversario, y durante un conferencia di prensa convoca Diamars atardi,
a anuncia cu nan lo celebra esaki, entre otro cu un 5K Fun Walk riba Diasabra 26 di Augustus.
E evento ta start 5:30 pm, na Avenida Milio Croes 106, banda di nan oficina. Nan ta organiza e evento aki cu e meta pa nan clientenan, publico y e empleadonan pasa un atardi cu hopi alegria den un ambiente agradabel.
Gerente general Randall Croes a menciona den conferencia di prensa diamars atardi: “Nos ta hopi contento pa celebra un logro grandi cu nos coleganan y henter Aruba. Nos tin tremendo premionan pa duna e dia aki despues di e Fun Walk. Lo tin musica, un car show desde 10:00’or di mainta, un ehercicio pa warm up nos participantenan y hopi mas. Nos ta invita tur interesado pa registra na tempo prome cu esaki sera, pa sigura bo participacion na e evento historico aki.”
Sagicor tambe ta yama Bon Bini na tres sponsor principal: Caribbean Mercantile Bank (CMB), IBiSA, y Powerade. IBiSA ta dunando nan sosten cu e organizacion y logistica di e evento y Powerade lo patrocina e start y e finish hunto cu bebida pa tur participante durante di e Fun Walk.
Participantenan por registra caba riba nan website. Por bay na:
Pago por worde haci por medio di nos partner IBiSA. Contribucion pa e Fun Walk ta diescinco Florin pa adulto y diez Florin pa mucha te cu 12 aña, cu e recibo di pago por pasa busca e t-shirt na oficina di Sagicor.
Registracion lo tuma lugar te cu dia 24 di augustus, y buscamento di t-shirt lo ta diaranson, 23 di augustus y diahuebs 24 di augustus, desde 9:00 am te cu 6:00 pm y diabierna, 25 di augustus di 9:00 am te cu 4:00 pm na oficina di Sagicor. Por fabor, corda bin cu e recibo pa por busca e t-shirt.
DIARIO a compronde cu tin lugar pa maximo mil participante na e evento aki, cu lo cuminsa desde 5:00 or di atardi cu un warm up. Ta pidi pa tur particpantenan yega na ora. Ademas di e t-shirt, lo haya tambe un medaya como recuerdo pa bo participacion na momento di yega finish.
Lo bay tin varios premio atractivo, incluyendo Weekend Stay y Dinners. Tur hende mester ta presente na momento di saca premio cu e oportunidad di por bay cas cu un bon recompensa pa bo esfuerso. Tambe lo tin un premio pa e grupo mas anima.
Sagicor Life a worde lansa na Aruba na mei 1986 bou di liderato di Señora Marisella Bronswinkel cu tabata e General Manager escogi di e Aruba branch di Capital Life Insurance Company Limited. E branch a join e famia di Sagicor na 2004, birando un compania, Sagicor Life Aruba N.V. na 2007.
