Magaly Maduro, coordinador FCVR:
ORANJESTAD (AAN) – E coordinador di Fundacion Contra Violencia Relacional (FCVR), Magaly Maduro, a splica den entrevista cu DIARIO, cu awendia tin un desaroyo cu ta causando hopi daño, na diferente mucha muher adolescente, aki na Aruba.
Esaki ta saca potret y filma video di mucha muher sunu. E daño causa ta hopi grandi, cu por dura pa bida largo, cu consecuencianan emocional y di salud mental.
E no ta algo cu mester tume leve, y bisa “ya, el a pasa” pasobra e tin su consecuencianan pa hopi largo, Magaly Maduro ta reitera. Pa hobennan aki, e consecuencianan tin di haber cu e hecho cu nos comunidad ta chikito, e persona afecta ta wordo stigmatiza, hendenan por señale cu dede riba caya, e mucha muher no ta durf di sali for di su cas, no kier bay scol y, automaticamente, e ta cay atras den su estudio of bira un drop out, cu tur e efectonan negativo cu e ta trece cune, incluso pa trabao dia di mañan. El a reitera cu enfasis cu e consecuencianan ta pa bida!
Mientras cu na Merca, Europa y otro paisnan tin debatenan tumando lugar pa cambia e leynan, encuanto rednan social, entre otro pa evita e problema menciona, na Aruba ainda no ta toca e tema aki. Pero esaki no ta tarea di e fundacion. FCVR ta señala e problema, pero tin otro instancianan cu esey ta nan trabao.
FCVR tin bon colaboracion y sosten cu otro instancianan cu nan ta sinta un bez pa luna, pa wak casonan y con nan por haci. E dama a indica cu Minister di Husticia a instala un “Advies Commissie” unda tin diferente partners sinta den dje, unda nan ta trahando y pa Juni proximo nan tin cierto cantidad di conseho cu ta bay duna na e Minister.
