Impacto politico riba necesidad empresial mas grandi pa habri negoshi
ORANJESTAD(AAN)—Tempo ta e miho maestro den politica tambe.
Esaki ta keda claramente demostra den e realidad cu otorgamento di tereno na publico, a bira uno di e problemanan cu a resulta den tantisimo caso cu husticia mester a atende.
Uno di e puntonan mas aserta cu a wordo tuma dor di Gobierno Evelyn Wever-Croes tabata e decision cu ta saca otorgamento di tereno for di man politico pa asina evita cu wega politico por wordo hunga cu propiedad di Pueblo y inhustacia ta wordo comete cu personanan cu no tin placa pa pone riba mesa pa cumpra fabor politico.
Democracia ta basa riba derecho igual pa tur hende pero ora observa cuanto problema politico a base di otorgamento di tereno a resulta den man di huez, ta bini dilanti cu hopi tempo pasa mester a tuma decision pa pone un fin na e abuso di nos leynan.
Pa Aruba sigur e decision di Prome Ministro Evelyn Wever-Croes pa schrap e posibilidad cu tereno por conduci na conducta corupto, ta di sumo importancia si tene na cuenta e necesidad grandi di vivienda na Aruba, cu tabata basa su mes pa tradicion riba vivienda propio.
Prijs di tereno ta uno di e gastonan mas grandi den e inversionnan total di un persona cu kier construi nan cas sigur na terenonan cu ta di mas renombre/
Realidad ta mustra con e scandalnan politico mas grandi cu Aruba a conoce ta basa riba tereno y mester conclui na fin di e siman aki cu uno di e mihor decisionnan cu a wordo tuma dor di Prome Ministro Evelyn Wever-Croes tabata pa schrap e posibilidad cu politica ta wordo hunga pa interes personal cu propiedad di Pueblo.
Negoshi cu tereno cu ta di Pueblo di Aruba asina a wordo entrega na e departamento concerni y ya tereno di Pueblo no ta parti di regalonan cu politiconan por haci a cambio di placa ni otro forma di regalo.
