El a confirma posicion firme di DIARIO enfrente grupito den AVP
*Mester investiga maneho social economico di Gobierno Mike Eman
*Presenta lista oficial di Arubianonan cu a pidi pero no a haya tereno
ORANJESTAD(AAN)—Dia 14 di April 2023, Huez lo transforma e acusacion di Benny Sevinger den veredicto contra e ex Ministro y actual Parlamentario, cu a duna Aruba y Reino prueba di e poder cu e tin den AVP, cu a exigi Aruba pa acepta cu den detencion preventivo e por tabata candidato oficial di AVP pa Parlamento.
E tratamento di e caso di Bennu Sevinger den Corte di Husticia, a crea un sabor sumamente amargo pa politica na Aruba cu a perde credibilidad den bista di Pueblo.
A medida cu e caso tabata desaroya, Aruba a mira su comunidad parti den dos grupo. Na un banda e lista largo di acusadonan tabata papia di e forma cu segun e acusacionnan, placa tabata dicidi kico lo pasa cu peticionnan pa hende haya un tereno.
E caso a mishi directamente cu e Arubiano, cu tin e tradicion pa lucha pa un cas propio construi riba un tereno cu no tur hende a hereda of tin placa na banco pa cumpra.
Ta e necesidad di Pueblo pa tin espacio pa construi su cas, a habri caminda pa e escandalo di tereno cu si tur e acusacionnan ta berdad, a duna un indicacion con a abusa di provisionnan di ley pa un hende haya tereno pa construi su cas of tambe por ehempel habri un negoshi of realisa proyecto di plantacion.
E caso den Corte, manera semper DIARIO a splica, a habri porta pa Parlamento cuminsa traha riba reforma di stipulacionnan cu ta atende cu tereno di Gobierno.
E caso den Corte a presenta den acusacionnan, cantidad di posibilidad pa hende sabi usa tereno di Pueblo pa haci negoshi, loke ta nifica cu terenonan valioso pa Arubianonan cu a sigui reglamentonan di Ley, a bira acto di corupcion segun e acusacionnan.
DIARIO a adverti Aruba pa e impacto cu e caso aki tin pa politiconan di AVP, partido cu na forma constante, a wordo somete na investigacionnan criminal y condena.
Pa DIARIO un momento sumamente importante a presenta, awor cu uno di e candidatonan di mayor importancia den AVP, Rycond Santos do Nacimento, publicamente a bay contra e “grupito” den AVP cu ta responsabel pa e pensamentonan negativo cerca Pueblo di Aruba.
Segun informantenan awor e miembronan di fraccion di AVP den Parlamento, incluso pues Santos do Nascimento, mester realisa investigacionnan den nan partido y den Parlamento pa determina con por ta posibel cu un partido, representantenan di e Partido den Parlamento, gobernantenan den funcion, no ta mira con miembro di nan partido ta kibra ley segun ya Corte di Husticia a determina of manera den e caso di Benny Sevinger ainda mester wordo determina.
E declaracionnan di Santos do Nascimento a haci hopi impacto, pasobra e ta un experto legal cu ya tin basta tempo den seno di e partido, caminda segun acusacionnan atrobe, casonan criminal ta desaroya.
Segun expertonan Santos do Nascimento como experto riba tereno legal, mester cuminsa un investigacion den su propio partido (cuminsando na e top mas halto) pa determina kico a bay robez y a stroba tur miembronan di e partido pa mira loke “un grupito” ta haci den e partido.
Tambe mester investiga, pakico atrobe miembronan di Parlamento di AVP lo no a ripara kico gobernantenan cu nan a scoge como gobernante, ta haci den e circulo imediato di e partido.
Informantenan a indica cu Santos do Nacimento awor tin un tarea enorme pa bay investiga kico a pasa den su partido y kico e por haci pa pone un fin na esaki sigur teniendo na cuenta, cu mayoria di votadornan di AVP no ta sostene scandalnan cu a tuma lugar of lo a tuma lugar den nan circulo imediato.
Un cos ta sigur. E declaracionnan di Santos do Nascimento a confirma informacionnan di DIARIO entorno e scandalnan produci pa mundo politico local.
