Mike kier a haci Aruba hub di companianan Hulandes na 2013
*Prome cu eleccion 2013 el a aplaudi maneho di Mike Eman
*Ley di Contabilidad di Aruba ignora y awor exigencia RAfT
ORANJESTAD(AAN)—“Aruba mester para firme den e situacion cu ta presente su mes”.
Esaki ta insistencia di informantenan cu ta mustra Aruba tin un Ley cu ta obliga gobernantenan na mantene nan mes na bon uso di placa di Pueblo y cu loke Hulanda mester a impone for di 2013 tabata, cu Ley di Contabilidad lo haya mas contenido pa asina defende Aruba contra gobernantenan cu no ta tene nan mes na e reglanan pa atende cu e placa di Pueblo di Aruba.
Segun informacionnan cu DIARIO a ricibi di Hulanda, tin un probabilidad grandi cu politiconan Hulandes cu tabata na mando for di 2014, den e caos politico total cu ta existi na Hulanda actualmente, lo trata na usa entre otro e debe causa pa pandemia 2020 na Aruba pa haya voto.
DIARIO a entrega prueba cu el a guia Aruba corectamente den e desaroyonan politico na Hulanda, caminda problemanan serio cu e pais ta enfrenta, ta amenasa e resultadonan di eleccion pa partidonan na mando, mientras cantidad di cara conoci y popular ta bandona politica of ta cambia di partido.
Informantenan digno di credibilidad ta indica na DIARIO cu mundo politico na Aruba mester para fuerte den su zapato y mester tene Hulanda responsabel pa e situacion politico cu Aruba a conoce na 2013 cu a conduci na un victoria aplastante pa Mike Eman mientras Hulanda tabata na haltura di problemanan financiero serio na firmamento politico di Aruba.
“Mark Rutte tin hopi pa splica Aruba y cu el a influencia directamente cu su palabranan tocante Mike Eman, cu el a elogia na Juli 2013 ora el a realisa un bishita cortico na Aruba,”a bini dilanti.
Informantenan ta indica cu uno di e programanan mas importantenan di Gobierno Mike Eman tabata pa atrae companianan Hulandes pa Aruba, cu mester a bira un hub comercial entre Hulanda y continente Mericano.
Pa politiconan Hulandes e tabata sumamente atractivo na momento cu Mike Eman tabata deshaci di e Ley di Contabilidad di Aruba, cu ta regla con politiconan di Aruba mester gasta placa di Pueblo.
“Na 2013 ora Mike Rutte tabata na Aruba, algun luna prome cu e eleccion den cual Mike Eman lo a bira e gran triunfador aunke ya Aruba tabata den problema serio, Rutte a admiti cu ya Aruba tabata tin problema financiero serio pero cu segun su persona ya tabata haya atencion. Na mes momento el a elogia e programa pa trece companianan comercial,”informantenan a indica.
Na 2014, e mes gobierno Rutte a presenta pa baha Mike Eman for di Fort Zoutman y impone supervision riba Mike Eman cu a destrui e situacion financiero di Aruba,”a bini dilanti.
Awe Hulanda kier impone RaFt riba Aruba pero na 2013 Hulanda a permiti Mike kibra e base di e Ley di Contabilidad, cu ta duna tur solucion pa actua contra mal gobernacion di placa di Aruba.
DIARIO a tuma nota di e Jaarrekening 2013 di Aruba, manera prepara pa Algemene Rekenkamer di Aruba, cu claramente a papia di e situacion cu tabata existi a e momento riba tereno financiero di Aruba y cu no tabata coresponde cu e maneho cu Ley ta exigi di gobernacion.
Segun informantenan Aruba mester colecta tur evidencia pa duna e prueba grandi na Hulanda con politiconan Hulandes y sigur e Gobierno di Mark Rutte, a yuda sigura e victoria electoral d Mike Eman na 2013 pa na 2014 implementa supervision financiero na Aruba, cu despues a wordo confronta cu proyectonan importante cu tabata wordo prepara cu mundo comercial Hulandes manera riba tereno di energia ya tabata na disputa den atraccion di un proyecto di gas pa Aruba.
