Parlamento Hulandes cu vacacion y mundo prepara pa economia di guera
*Cuatro miembro Gobierno di Reino ya a bay ocupa otro posicion
*Decision Union Europeo mester exigi Reino schrap RAFT pa Aruba
ORANJESTAD(AAN)—Den e suspenso mundial cu ta reina a base di e confrontacionnan entre otro na Ukraina y Medio Oriente, Reino Hulandes a haya un atencion cu ni ciudadanonan Hulandes a spera.
Na e momentonan aki, atencion mundial ta dirigi riba Gobierno di Reino, di cual Aruba ta forma parti, despues cu a bira conoci cu e actual Prome Ministro di Reino, Mark Rutte, ta wordo considera e candidato mas importante pa asumi e puesto di Secretario General, pues dirigente di e union militar di NATO.
Ta posibel cu na Mei ya Rutte lo keda nombra den e puesto nobo ora e tratado Noord Atlantico celebra su 75 aniversario?
Esaki ta uno di e sugenrencianan cu ta wordo haci, mientras Hulanda a bira centro di atencion mundial na un forma cu a hasta pa DIARIO, cu normalmente por adverti di cual direccion por spera biento politico, a bira un sorpresa.
Bista di mundo ta dirigi riba Hulanda cu un Parlamento cu actualmente ta den recesion, mientras un Informador nobo mester traha riba un modelo di gobernacion cu ta aceptabel pa tur partido cu lo por traha cu otro.
E prome advertencia di DIARIO cu e suma di defensa di Reino a haya hopi atencion durante tratamento di Presupuesto den Parlamento no mucho tempo pasa, ta wordo sigui awor cu informacionnan cu defensa lo conoce un aumento importante na Hulanda.
Informacionnan cu ta uni nan mes na declaracionnan di dirigentenan politico di tur pais, cu ta considera cu e celebracion di 75 aniversario di NATO, lo bira e momento cu lo anuncia cu Rutte lo haya mando di e organisacion.
Sumamente interesante ta declaracionnan cu Rutte lo mester bay duna Putin e prueba cu Putin no por kere cu e ta sigui cu su plannan pa invadi paisnan Europeo manera el a haci cu Oekraine.
Hulanda durante ultimo 24 hora, mas y mas ta den noticia pa motibo di e dirigente politico di Reino Hulandes, Mark Rutte, cu ta dirigi un Gobierno, cu mester bay cas na momento cu otro constelacion di Ministro wordo nombra, pero ya a despedi di cuatro miembro di gobierno.
Dirigi NATO no ta un tarea facil, ya cu e miembronan tin diferente interes. Sinembargo, ta wordo spera cu Rutte tin e capacidad pa mustra Rusia, cu situacion internacional a cambia y cu mundo awor ta prepara pa un economia di guera.
Kico realmente lo tuma lugar den seno di Reino na 2024, diripiente a bira sumamente dificil pa pronostica y segun informante e momento a yega pa den e Conseho di Ministro di Reino, Aruba wordo informa debidamente di loke ta pasa.
Informacionnan cu DIARIO a ricibi ta indica, cu na prome lugar Gobierno di Mark Rutte mester disculpa su mes pa e forma cu el a trapa riba Statuut, exigiendo di Aruba aceptacion di un supervision mientras Aruba tabata tin un maneho financiero mihor cu Hulanda.
Reino mester deshaci di e exigencia pa supervision financiero di Aruba actualmente, sigur despues cu den seno di Union Europeo tambe a kita e nomber di Aruba como pais cu no ta cumpli completamente cu e exigencianan di belasting di Nacionnan Uni.
Manera ta conoci for di siman pasa, Aruba actualmente ta cumpli oficialmente cu tur regla pues riba e tereno aki, por acusa Aruba di algo.
Importante si ta bira, segun informantenan, cu Gobierno di Reino ta informa Aruba debidamente kico ta intencionnan di Rutte ya cu e ta te awor e Prome Ministro di Reino.
Aunke Aruba no tin participacion den NATO, hecho ta keda cu Aruba ta parti di Gobierno di Reino, di cual Mark Rutte ta dirigente y Aruba ta mara riba tereno di relacionnan internacional na Reino.
E cuadro cu a wordo crea durante 2023 den Reino a cambia completamente y segun informantenan awor Gobierno Mark Rutte tin e deber di informa Aruba debidamente di tur loke ta pasa.
Como dirigente di Gobierno di Reino, segun informantenan, Rutte tin e deber di informa tur ciudadano Hulandes, si e ta e candidato principal pa e puesto di NATO den un situacion mundial serio.
Informantenan ta mustra cu e situacionnan cu a presenta nan mes den Gobierno Hulandes for di e caida sin motibo clave di Gabinete Mark Rutte, a hinca henter Reino cu tin interdependencia den un situacion special, den cual Aruba mester ta bon informa como partner igual segun Statuut.
Hulanda mester hala su exigencia pa RAFT pa Aruba atras y splica Aruba kico Reino cu ta encarga cu Defensa y Relacionnan Internacional, por spera!
