Temporada di horcan 2025 cu intensificacion di peliger mas grandi
*Intensificacion rapido ta exigi preparacion prome cu temporada
*Beach ta e centro di impacto grandi di horcan pa hopi motibo
ORANJESTAD (AAN) — E prome tres lunanan di 2025 ta tras di lomba. Cu inicio di April, Aruba mester cuminsa prepara su mes pa uno di e peor enemigonan natural di hende, cu ta un horcan.
E capacidad destructor di un horcan, ta sconde den su bientonan y e energia cu ta surpasa e potencial pa destruccion di varios bom nuclear.
Na inicio di e temporada 2025 pa e region di cual Aruba ta forma parti cu ta Oceano Atlantico, preparacion mester ta un hecho y mester deshaci tambe di creencianan antiguo, manera tormentanan importante a duna prueba durante ultimo aña.
E ser humano cu kier tuma control riba naturaleza, a haci esaki a base di progreso contra naturaleza, cu tabata su inspiracion pa descubrimentonan nobo.
Di e descubrimento di candela, cu tin efecto directo riba naturaleza no solamente pasobra e ta kima pero pa loke e ta depone den aire, hende a duna continuacion na creacion di situacionnan cu ta afecta e curso natural di mundo.
Mas hende progresa, mas naturaleza ta duna prueba cu e no por wordo controla pero cu mundo mester adapta na su exigencianan pa sobrevivencia di hende, di naturaleza y di mundo mes.
Condicionnan di calor cu a nace di cliamanan cu hende a afecta cu cantidad di descubrimento y forma nobo di bida, ta causa efectonan desastroso pe hende.
Pa cuminsa por nota, cu e laman cayente entre costa Africano y e region central di conteninente Americano, a trece cambio den loke hende a establece como comportacion general di horcan.
Mas y mas por a nota, con horcan poderoso por nace prome cu e temporada di horcan y cu despues cu e temporada aki termina, ainda tin posibilidad pa e sistemanan destructor, sigui presenta nan mes sin avisa.
Pa hende por a prepara su mes pa enfrenta temporada di horcan, el a cuminsa tuma pakete di medida pa evita e resultado desastroso di un horcan.
Hende a crea ruta, velocidad y cantidad di cualidad pa horcannan, cu awor ta kibra tur regla den un ambiente natural nobo cu hende mes a comberti den mihor facilidad pa mas peliger di horcan.
Preparacion contra un horcan, ta e arma ,mas eficaz cu hende tin y esaki ta encera, cu hende ta prepara su mes pa sobrebibi un horcan.
Un punto importante semper tabata, cuanto tempo tin pa un comunidad bati alarma y prepara contra un atake di un horcan.
Mester tene na cuenta e realidadnan di un horcan, cu ta sigur destruccion grandi na lugarnan cu areanan di beach grandi y cu nivel di tera cu no ta hopi mas halto cu laman.
Na momento cu un horcan yega cerca, hende mester bandona e lugarnan directamente na beach, pero con leu hende mester bay for di beach, ta keda e pregunta.
Beach ta e lugar mas peligroso den tempo di horcan pa hopi motibo, manera na paisnan grandi, ta keda confirma.
Na momento cu un horcan ta alcansa tera, e ta controla te den fondo di laman, cu e ta atrae pa su centro di energia enorme.
Ora contempla laman prome cu un horcan, por nota cu e ta bira calmo y hasta ta parce cu e beach ta bira mas grandi. Esaki ta e prueba grandi di loke ta den preparacion di e sistema cu ta atrae energia destructivo cu cual despues e ta azota tera firme.
E temperatura halto di laman ta sumamente importante den formacion di mal tempo y ta alimenta e sistemanan mas monstruoso riba nan ruta devastador.
Pa por confronta y prepara pa tur peliger, hende a realiza cu preparacion for di tempran ta e mihor forma pa confronta peliger di un horcan.
Pa Aruba sigur esaki ta un hecho. Manera ya bisa, e beachnan cayente di Aruba ta un entrada perfecto pa tera pa un sistema tropical.
Aruba no tin hopi cero, cu ta duna proteccion y defensa na un pais ora un sistema tropical ta acerca.
Economia di Aruba ta depende di e parti mas vulnerabel na momento cu bati alarma di horcan. Teniendo cuenta cu e turista, evacuacion y proteccion humano den e area di hotelnan ta bira un asunto primordial.
Pa Aruba pues e tempo pa prepara pa un sistema tropical, cu no necesariamente hasta mester di forza di horcan pa azota Aruba, ta sumamente importante.
Informacionnan nobo ta indica, cu ta hustamente riba e tereno di preparacion mester tene cuenta cu e cambio grandi.
Cientificamente a keda proba, cu e no solamente e forza y posibilidad pa un horcan a aumenta, pero cu e velocidad cu cual un horcan ta desplaza su mes, a aumenta.
Esaki pues ta duna hende menos tempo pa prepara nan mes loke ta nifica cu comunidad awor mester cuminsa traha riba e proximo temporada.
DIARIO, prepara pa na forma y cu preparacion profesionalpa informa publico como corant, lo guia su lectornan den temporada di horcan, na 2025 lo cumpli cu su tarea cu asistencia cu semper el a goza di expertonan local y internacional, semper a base di Servicio Meteorologico, como autoridad di asunto di clima.
