ORANJESTAD (AAN): Awe Dialuna 19 di augustus, lo tin otro Rosario Bibo na kapel di Alto Vista.
Lo cuminsa resa pa 7 or y mey di anochi y cada persona por presenta su intencionnan personal y tambe general.
Lo pidi Señor pa libra nos isla di mal tempo y bendiciona Aruba cu poco awacero. Tambe lo resa pa e aña escolar nobo cu ta cuminsa dia 19 di augustus. Pa tur mucha grandi y chikito por tin un aña escolar exitoso; no solamente cu logronan personal manera bunita rapport pero tambe pa nan cera bunita amistad cu nan otro compañeronan. Pa tur maestro por ta bon guia pa tur mucha, yuda e muchanan cu nan tarea pero tambe yuda nan cu si nan problema di comportacion y social.
Pa mayornan por tin bon comunicacion cu nan yiunan, stimula e muchanan y mantene bon contacto cu scol pa nan ta semper na altura di e desaroyo di nan yiunan.
Lo resa pa tur enfermo pa nan haya alivio den nan sufrimento, pa tur adulto mayor haya atencion necesario di nan sernan keri, pa tur trahado tin exito na nan trabou.
Un y tur ta keda cordialmente invita pa asisti na otro Rosario Bibo, dialuna 19 di augustus, pa 7 or y mey di anochi na kapel di Alto Vista.
