ORANJESTAD (AAN): Ricardo Croes di Partido RED, kende den ultimo eleccion no a haya asiento pa bay den Parlamento, a tene un conferencia di prensa pa cuestiona loke a pasa na Arubahuis.
Diasabra 1 di mei 2021, algo mas cu 1 luna prome cu eleccion, Prome Ministro a ricibi un carta for di Arubahuis conteniendo diferente preocupacion pa cu e comportacion di exminister plenipotenciario sr. Besaril. E carta di un grupo di ambtenaar cu ta den nan mayoria sostenedornan di MEP (segun nan mes ta decribi den e carta) a dirigi nan mes pa medio di un carta na PM E. Wever-Croes. Den e carta nan ta trece padilanti cu pa un periodo largo caba di mas cu 3 aña nan ta preocupa y cu nan tin obyeccionnan moral y di etica y un fuerte sensacion di inseguridad den relacion cu e funcionamento y e accionnan indebido di e ex minister.
E grupo ta describi con ex minister sr. Besaril tabata haci y deshaci na su antoho cu placa di pueblo como sifuera ta di dje mes e ta. E grupo a comparti cu PM E. Wever-Croes un lista di prueba cu nan a acomula contra e minister y a pidi MP pa si ta posible no pone ex minister aki ni ariba su lista mas, cual nan mes a realisa cu por ta tabata laat pa esey caba paso ya e lista pa eleccion 2021 tabata cla dia bieu.
Den e carta ta menciona con ex-Minister sr. Besaril a pone Arubahuis den cora, cos cu masha tempo no a sosode. Tambe a menciona con a dicidi di bay huur cas y drecha hardin costando decenas di miles di Euro mientras cu Aruba ta den crisis financiero. Preguntanan di parti di ReD ta: Unda e control di gobierno a keda? Unda integridad a keda? Anto ta trata di un ex agente policial. Locual tur hende por wak den e carta manda pa MP ta cu MP ta bay over na pidi e nomber di esnan cu a acomula e pruebanan y traha e carta. Dimes e no a ricibi esaki paso dje tapa ey tog nan no ta.
Mi a worde poni na altura cu nan no a haci nan mes conoci na MP paso nan ta teme pa persecucion politico. Nan tabata teme cu sr. Besaril lo termina back como minister plenipotenciario di MEP cu tur e consecuencianan cu esey por tin. Imagina bo e delirio di grandiosidad cu ta biba cerca e hendenan aki te cu e ex minister ta bay biaha su biahe di placer y e no tin suficiente cu un bon salario sino ariba dje ta bay gasta placa di pueblo pa huur y hunga grandi den VIP Lounge na Schipholl.
Bale la pena pa mandatarionan di MEP aki cu pueblo a escohe. Mientras ex Parlamentario Sueann Ras tabata wak Netflix den Eerste Kamer na Hulanda durante un reunion importante y a escohe pa gaña cu ta pasobra ex Parlamentario Ricardo Croes tabata na palabra el a dicidi di bay wak Netflix y despues tur hende por a wak e grabacion cu tabata mustra cu ora e tabata wak Netflix Parlamentario Croes tabata sinta su dilanti mes, menos cu 1 meter leu. Sr. Besaril tabata biba lekker na Hulanda y tabata hunga grandi ariba custia di pueblo. Sr. Besaril a traha acuerdo cu amigo pa organiza e actividad nan di Arubadag sin cu e amigo sa kico e ta haci paso e no tin experiencia den esaki, segun e carta ta bisa. Ta cu ki intencion e ex minister aki por a actua asina aki? Ta ki beneficio e ex minister por tin pa sera un deal asina.
Ricardo Croes ta puntra ta cua ta e beneficio pa pais Aruba cu un comportacion asina aki? No tin niun control di parti di gobierno di Aruba ariba e manera di funciona y comporta di su minister plenipotenciario na Hulanda y/of Merca? Segun ami a comprende MP E. Wever-Croes tabata na altura for di 2020 caba cu e integridad di sr. Besaril tabata worde cuestiona door di su coleganan pero a escohe pa manda esaki doofpot cu tur e consecuencianan. E acusacionan haci den e carta aki ta hopi serio mes pa Partido ReD Democratico. Partido ReD Democratico ta puntra su mes ta kico integridad ta significa pa gabinete Wever-Croes II. Unda sr. Ursell Arends a keda?
