ORANJESTAD (AAN): Diasabra tabata un dia basta druk pa Aeropuerto Reina Beatrix.
Turismo di Aruba ta recuperando poco poco y esaki sigur ta un refleho di e confiansa cu e turistanan tin den e isla y e maneho cu ta wordo realisa pa loke ta Covid-19.
Diasabra Aruba a ricibi 4 mil turista riba un solo dia. Mas y mas turista ta constatando cu Aruba ta un isla safe y cu ora nan ta bishita Aruba ta pasobra nan tambe kier sinti nan mes safe.
Mayoria di e bishitantenan ta personanan cu a haya nan vacuna contra Covid-19 caba y locual ta capta e atencion ta cu nan deseo ta pa Aruba cuminsa flexibilisa e medidanan di entrada y laga drenta esnan cu a vacuna sin cu mester di un PCR Test.
Esaki ta comentarionan cu ta wordo ricibi pa medio di e rednan social unda esnan cu kier bishita Aruba of ta bay bishita Aruba den e proximo dianan kier pa asina por reduci e gastonan y por disfruta y sigur gasta mas na e isla.
Hopi turista a laga sa cu nan kier keda na Aruba mas tempo pero door cu tin cu paga pa e PCR test dos biaha (ora di bin y ora di bay), esaki ta reduci nan budget ora di pensa di paga un alohamento.
Ta spera cu e vacunacion por sigui bay manera e deseo ta y asina yega na un 85%. Esaki sigur lo trece cu ne cu pronto mas y mas turista dicidi di keda mas dia na Aruba aportando na e economia di e isla.
