Parlamentario Shailiny Tromp-Lee:
ORANJESTAD (AAN): Dia 8 di maart, ta un dia importante pa nos recorda y celebra e lucha cu a tuma lugar, pa nos ta awe unda nos ta como hende muhe. Ta hopi lucha a tuma lugar riba diferente nivel. Hende muhe mester a lucha den e constelacion familiar, den relacion matrimonial, na pia di trabou y den comunidad en general.
Nos no por perde di bista cu nos posicion no tabata semper similar cu awendia. Nos no mag di lubida cu tabata existi tempo den historia caminda e hende muhe no tabata mag di vota, no tabata mag di studia y no tabata haya e pago igual eherciendo e mesun trabou cu un hende homber.
Riba e fecha 8 di maart, nos como hende muhe mester keda reconfirma nos compromiso pa balora, sostene y celebra logronan di otro y tambe pa para ‘schouder cu schouder’ cu otro na momento cu un ta luchando cu algo. Percura pa cada luz di e hende muhe por briya y keda briya. Na Aruba nos mester ta contento di por wak mas y mas muhe ta eherce funcionnan importante den nos pais, cu antes mayoria tabata wordo eherci pa hende homber. Nos tin un Prome Minister femenino, den Parlamento nos ta yegando cerca di un constelacion di 50%-50% entre hende muhe y hende homber, directornan den sector publico ta wordo eherci pa hende muhe, hopi CEO’s den sector priva ta hende muhe y asina por sigui menciona. Na mes momento nos mester realisa cu no na tur parti di mundo e hende muhenan ta den mesun situacion cu nos aki na Aruba. Nos no ta unda nos mester ta y mundialmente ainda tin hopi trabou pa haci.
Riba e dia aki Gobierno tin un actividad parti mainta cu ta bay ta full house. Un danki na tur cu a registra y cu lo haci e mainta aki exitoso. Como partido, MEP tambe tin un actividad dia 8 di maart na nos CEDE na Santa Cruz di 8’or pa 10’or di anochi pa nos duna atencion na e dia importante aki. Informacion pa registracion por haya riba nos pagina di Facebook. Tur dos actividad ta premira di ta bay ta un exito total.
Ban hunto para pa un mundo sin prehuicio, stereotipo y discriminacion. Un mundo caminda e hende muhe ta celebra logro di otro y balora aporte y lucha di otro.
Na pueblo completo: Feliz Dia di Hende Muhe!
