ORANJESTAD (AAN): Informacion nobo for di isla di St. Maarten, ta indica cu na comienso di luna di December, un total asombroso di 66.000 congla di awa dushi a wordo confisca abordo di un barco,
durante un operacion conhunto cu Wardacosta di Caribe Hulandes, Nature Foundation di St. Maarten, y Aduana. E conglanan aki di awa dushi, por yega te na un largura di 1,5 meter, y tabatin un balor riba mercado di como 37.000 Dollar.
E especie di congla aki a wordo identifica como e ‘American eel’, conoci como ‘Anguilla rostrata’ cu pa colmo ta den peligro di extincion. Nan a wordo confisca riba un barco na St. Maarten, actuando riba un tip di oficialnan di Republica Dominicana, cu ta e pais di unda e boto a yega originalmente. Tur congla ainda ta bibo, y esfuerzonan ta andando pa trata di debolbe nan pa nan habitatnan natural.
Tabata dia 5 di December cu Wardacosta durante inspeccion di rutina di un barco di carga cu a yega di Republica Dominicana, a bin descubri mas di 25 caha cu ta contene congla bibo, y no tabatin ningun documento oficial pa cu permisonan di importacion di nan.
Mirando cu aki lo por ta trata di traficacion di animalnan silvestre, a core alerta Nature Foundation di St. Maarten, cu ta sirbi como e autoridad di e isla pa e Convencion di Traficacion Internacional di Especienan den Extincion di Fauna y Flora (CITES). A core check cu autoridad di CITES Dominicano, cu a envolvi e agencia nacional di CODOPESCA, y nan a confirma cu e documento cu e barco tin ta fraudulento, y a identifica e Conglanan aki como e American eel. Pues e barco tabata operando ilegalmente violando ley internacional. E siguiente dia, dos oficial di CODOPESCA a yega St. Maarten pa asisti den confisca e cargo ilegal. Ademas di e conglanan, a confisca un tanki di oxigeno y otro ekipo di aquacultura. Tur congla hunto cu peso di 9,4 kilo, a wordo manda bek dia 9 di December pa Republica Dominicana via cargo aereo pa na e pais nan wordo hiba bek den awa fresco.
Segun CODOPESCA, traficacion ilegal di e congla aki ta sosode hopi den Caribe.
