President di Parlamento, señor Marlon Sneek:
ORANJESTAD (AAN): President di Parlamento, señor Marlon Sneek den un entrevista recien cu DIARIO, a conta di su biahe recien na Hulanda principalmente pa atende e reunion di IPKO. Entre otro, a reuni cu representante di Aruba na Raad van State, señor Andy Lee riba e topico Rijkswet. Señor Sneek a expresa cu hopi biaha politiconan ta purba di bruha e comunidad di con e proceso di Rijkswet ta cana.
Segun Sneek a splica, e proceso di Rijkswet ta bay segun e via normal. Rijkswet mester pasa pa Raad van State cu ta comparable cu Raad van Advies di Aruba cu tin e responsabilidad pa duna conseho riba tur ley cu Gobierno di Hulanda kier propone. “Nos a presenta nos preocupacionnan na señor Lee y a hiba un bon combersacion caminda señor Lee a compromete cu e lo bay pone atencion na e diferente inkietudnan cu a wordo presenta”, Señor Sneek a remarca.
Ademas, Señor Sneek a participa tambe na e reunion tripartiet. Durante e reunion aki, conhuntamente, e islanan Caribense di Reino a saca un resolucion caminda a duna sosten na e islanan aki. “Nos a informa nos coleganan di Hulanda cu nos ta saca e documento y cu nos ta duna sosten moral y na mesun momento a vocifera nos preocupacion pa e desaroyonan aki”, Sneek a splica.
