Minister di Enseñansa, Gerlien Croes
ORANJESTAD (AAN): Minister di Enseñansa, Gerlien Croes, a indica den un entrevista cu Matutino DIARIO cu un di e topiconan cu mas frecuentemente ta bin dilanti durante reunionnan cu scolnan, ta e retonan social cu ta manifesta nan mes den ambiente escolar.
Segun e minister, docentenan ta confronta cada vez mas cu situacionnan relaciona cu comportacion di alumno, mientras cu den cierto casonan ta dificil pa logra colaboracion necesario di parti di mayornan. Tin situacionnan unda mayor no ta suficientemente involvi den criansa di e mucha, of unda e menor ta biba cerca otro familiar cu a tuma e responsabilidad diario over.
Minister Croes a expresa cu e desaroyo aki ta preocupante y cu no por mira esaki solamente como un problema di scol of di Gobierno. Segun e, ta trata di un reto cu ta toca henter comunidad.
El a reconoce cu Gobierno no por “cria un comunidad di nobo”, pero si por contribui cu sosten, guia y programa cu ta yuda tanto muchanan como mayornan comprende e importancia di norma, balor, disciplina y responsabilidad. Tambe ta importante, segun e minister, pa prepara muchanan pa atende cu e retonan di bida diario y desaroya nan mes como ciudadano responsabel.
Den e contexto aki, Croes a elogia e trabao di diferente organizacion, entre otro Tienda di Educacion, Fundacion di Famia Plania y Telefon pa Hubentud, cu activamente ta contribui na educacion y guia di muchanan, incluso door di bishita scolnan y ofrece programa di conscientisacion.
No obstante, e minister ta haci un apelacion directo na mayornan. El ta reconoce cu hopi famia ta confronta cu presion, stress di trabao y otro dificultadnan, pero ta considera esencial pa mayornan sigui garantisa tempo, atencion y guia na nan yiunan.
Segun Croes, falta di e sosten y criansa aki eventualmente tin consecuencia no solamente pa e mucha of e famia, sino pa comunidad completo. “Nos muchanan ta nos futuro generacion y nos tin mester di nan pa eventualmente carga pais Aruba,” el a expresa.
Pa conclui, e minister a enfatisa cu cada miembro di comunidad tin su propio responsabilidad. “Nos mester keda corda y ripiti e responsabilidad cu cada un di nos tin, y no warda riba Gobierno pa tuma nos responsabilidad over,” Croes a manifesta.
