Funcionamento mester ta dirigi riba adaptacion pais na cambio
*Reaccion publicacion DIARIO entorno glas getint ta prueba
*Parlamento mester recobra dignidad di representante di Pueblo
ORANJESTAD (AAN) — Na dos forma cambio ta presenta su mes. Situacionnan ta cambio a base di revolucion, cu por considera un explosion di uno of mas factor, of a base di evolucion, cu ta a base di desaroyonan den transcurso di tempo.
Pa papia awe di e cambionan cu por spera na 2024, ta bini ampliamente dilanti, cu evolucion ta topa cu revolucion na e momentonan aki.
Ora papia di evolucion ta tene na consideracion, e desaroyonan historico cu a produci un pais autonomo Aruba; un Pueblo cu su necesidadnan y posibilidadnan cu a bira base di gobernacion democratico, cu mester funciona na bienestar di Pueblo.
Pa honra voluntad di Pueblo mester ta conoci cu loke ta biba den Pueblo, pa asina tambe tin alcansa e base pa e pais por funciona na man di personanan cu den eleccion Aruba a eligi den Parlamento, cu ta e cuna di tur gobierno cu wordo encarga cu labor diario di gobernacion.
Prensa, considera e cuarto poder di democracia, pa fungi como poder di Pueblo, mester tin e hermentnan pa compila y atende loke ta biba den Pueblo riba e base mas hancho posibel.
2024 ta na caminda y den un mundo di confusion y incertidumbre, medionan di comunicacion tin e tarea inmenso pa informa Pueblo riba tur desaroyo pero tambe permiti Pueblo entrega informacion den contacto directo.
Aki un ehempel por wordo duna.
DIARIO siman pasa a presenta e uzo di glasnan getint, cu segun a bini dilanti den sala di Corte a base di e cantidad di casonan registra, ta conduci na peligro grandi pa hende den trafico.
Glas getint lo ta haci uzo di luz mas fuerte necesario y ta obstaculisa e vista riba caretera y si plannan sigui, lo wordo prohibi.
Pueblo ta cumpli cu su parti den e discusion cu a habri y DIARIO a ricibi reaccionnan cu ta duna argumentonan pakico tin glas getint.
Diferente aspecto, manera seguridad personal, ta bini dilanti. Un aspecto cu no ta haya suficiente atencion ainda, sigur ta bira valido, cu ta e proteccion di personanan cu cancer di cuero, cu ta wordo afecta pa solo den trafico. Glas getint ta brinda proteccion pa nan contra solo.
Un punto sumamente interesante ta bini dilanti y ta mustra cu pa traha un caminda pa futuro den e situacion actual cu a presenta su mes, participacion di comunidad ta sumamente importante.
Cu gobernacion ta depende di e exigencianan pa bienestar di Pueblo, a bini dilanti den e formacion di Gabinete Evelyn Wever-Croes, cu a reuni cu tur organisacion y ciudadano, cu por a expresa loke mester ta contenido di gobernacion na Aruba na momento cu exigencianan mundial ta culmina pero tambe decisionnan fundamental pa futuro, ta necesario.
Actualmente ta papia di cambio, cu lo exigi hopi.
Manera semper nos a trece dilanti, cu Aruba tin un base mas fuerte pa sigui cana, debi na por ehempel e forma cu Gobierno ta atende cu salida di petroleo, a percura pa entrada di gas pero cu e proyecto di hydrigeno pa futuro.
Pero Gobierno den e sistema democractico di Aruba, ta representa e representacion di Pueblo, cu a wordo eligi pa medio di e proceso electoral.
Na caminda pa cambio y mas cambio, e sistema democratico mester ta e baluarte den cual gobernacion democratico ta culmina y den cual Parlamento como e organo entre gobernacion directo di e pais y Pueblo votador, ta funciona na un forma honroso y respetuoso enfrente e encarga cu el a ricibi di Pueblo.
Na e momentonan aki, e uzo di sala di Parlamento como centro di espectaculo pa busca y haya voto, mester yega na un fin.
Parlamento no por ta ocasion mas pa na un forma facil un ciudadano haya puesto y placa pa e por sinti su mes poderoso y importante como politico.
Parlamento no ta un centro di concurso di discurso ni midimento.
Si mira e cantidad di asuntonan cu mester wordo atende dor di Parlamento, ta imposibel cu ainda tin tempo pa wega politico.
Parlamento no ta depende di loke Gobierno manda Parlamento, pero tambe di asuntonan importante den Pueblo, cu ta wordo afecta dor di cambio y cu ta e nucleo cu lo conoce e cambio mas grandi, cu ta cambio di un generacion di hende pa otro hende den comunidad.
Exponentenan cu lo carga e futuro nobo ta presente. Un generacion nobo cu su propio exigencianan mester por prepara su mes pa bira representacion di Pueblo, cu na prome lugar ta recobra e dignidad y e moral halto di Parlamento como cara, boca, concenshi, cerebro, alma di Pueblo!
