ORANJESTAD (AAN): Recientemente, riba su mes peticion, señora mr. Monica Kock a ser descarga honorablemente di su posicion di Presidente di Conseho Electoral di Aruba.
Despues di un buskeda cuidadoso pa un sucesor adecua, señor mr. Rosslin (Rossi) Marchena, abogado di profesion, a asumi e responsabilidad pa acepta e presidencia. Ta considera su nombramento un paso importante pa e continuidad y e progreso di e Conseho Electoral. Anteriormente, señor Marchena tabata Presidente suplente.
Na su luga como Presidente suplente, señora Grasita Griffith, tambe abogado, lo emplea su experencia y experticio pa apoya e Conseho den su actividadnan.
Presidente di Corte, señor mr. Mauritsz de Kort, tabata encarga cu e nombramento di e Presidente, mientras señora Xiomara Croes-Williams, Presidente di Algemene Rekenkamer di Aruba, tabata encarga cu e nombramento di e Presidente suplente, tur esaki conforme articulo 5 di e Ordenanza Nacional Partidonan Politico (Landsverordening Politieke Partijen).
