Prome Minister: *Wever-Croes a sigui cu investigacionnan cu Lopez Tromp a cuminza cune
ORANJESTAD (AAN): Durante e conferencia di prensa di Gobierno di tur Dialuna, Prome Minister Evelyn Wever Croes a reacciona riba preguntanan cu el a yega di haya rond di e retiro di Marisol Lopez Tromp como minister.
“Den e dianan cu a pasa a bin hopi conmocion riba e tema aki y mi tabata kier pone cos den perspectiva bek, riba con e retiro di ex minister Marisol Lopez Tromp a bay”, segun Wever Croes.
El a indica cu na dado momento partido POR no tabata tin confianza mas den dje como minister y cu ora cu esaki ta e caso, tur regla den constitucion ta bisa cu bo no por keda como minister y bo tin cu tuma honor na bo mes y tuma bo retiro.
“Na e momento cu esaki a pasa mi a purba di intermedia, pasobra mi no kier a wak un crisis den Gobierno”.
Nos tabata tin varios session di intermediacion cu POR y e ex minister, pero e no a duna un resultado.
A yega asina leu cu den un reunion den Parlamento e fraccion di POR a entrega un mocion di desconfianza contra Lopez Tromp.
Esey no solamente ta mustra cu nan no kier a papia mas di dje, sino cu absolutamente nan no tabata tin cofianza mas den e minister, segun e Proem Mandatario.
El a sigui bisa cu esey a hinca Gobierno den un crisis.
Segun Wever Croes na dado momento tabata tin un discusion riba si e votacion tabata bon of no y presidente di Parlamento e ora ey a hala aden e mocionnan.
“Mi a purba di papia cu Marisol Lopez Tromp pa mi splike cu nos tin cu busca un solucion pa e situacion hopi serio aki”.
Por ehempel tabata necesario pa por vota entre otro pa presupuesto, sin cual no tin Gobierno.
Mi a purba di haya contacto cu Lopez Tromp pa mi splike unda nos ta para y pa mi tende di dje con e tin pensa pa surpasa e crisis, con e ta bay traha brugnan pa por yega na un situacion cu bo por traha atrobe, pasobra e situacion ey tabata ‘onwerkbaar’, segun Prome Minister.
El a sigui bisa cu diferente dia el a purba di tuma contacto cu Lopez Tromp y cu e no tabata tin gana di papia, ni atende cu un reunion di Ministerraad cu a wordo yama.
“Si bo no kier traha cu Parlamento y bo no kier traha cu Ministerraad, anto con bo por ta minister?”, segun Wever Croes.
El a splica cu ta importante pa para un rato keto riba esaki, pasobra tin un carta cu ta circula di Gobernador, cu ta un carta di e tempo ey.
Hustamente pesey e tabata yama Lopez Tromp pa papia di dje, ora cu contenido di e carta a bira conoci y ora cu presidente di Parlamento a tene un conferencia di prensa a base di e carta ey.
“Pesey mi tabata yame pa nos papia y no ta un dia so mi a yame, sino 3 dia sin haya su atencion”.
Esey a hacie un ‘onwerkbare arbeidsverhouding’, pues bo no por traha asina den ningun organizacion, segun e mandatario, kende a sigui bisa cu e ora ey Ministerraad a tuma e decision pa retira Lopez Tromp.
“Aruba tabata mey mey di un crisis y na e momentona ey nos no tabata tin mester di hende cu tabata tin miedo di enfrenta realidad”.
E retiro a bay via Gobernador y tabata totalmente legitimo.
Ex minister Lopez Tromp a tuma algun bon decision como minister y mi a sigui cu investigacionnan cu el a cuminza, pero lamentablemente e por a tuma mas decision.
E no a tuma nan pero ami si a tuma nan y mi a sigui cu mas investigacion.
El a cuminza cu e tema di corupcion y nos ta sigui investiga pasobra si e tey of no tey, esey no mester stroba cu nos ta busca integridad den tur departamento di Gobierno, segun Wever Croes.
