ORANJESTAD (AAN): Magaly Brito, Secretaria General di Sindicato SEPPA, a duna di conoce cu durante atardi for di diadomingo caba, tabata tin varios acercamento relaciona cu e tema di e accion anuncia di parti di e trahadornan di Arubus.
Segun Brito, e acercamento aki a conduci na un invitacion di parti di minister na un reunion pa dialuna mainta 8'or cu e intencion di wak con por a yega mas cerca di otro despues di e 'impasse' cu
a drenta aden.
El a agrega cu dialuna mainta a yega na un acuerdo, un protocol, cual ta wordo considera como parti di e protocol di december 2019, unda a palabra cu e partidonan lo yega na un structura salarial nobo pa e trahadornan di Arubus y cu e fecha di implementacion ta 1 di januari 2021.
Esaki mes ta loke a trece problema pasobra Arubus di su banda na december a dicidi di implementa e structura salarial aki sin cu e partidonan tabata tin un acuerdo. Varios obhecion a wordo treci dilanti cerca mediador di gobierno. Asina mes den december nan a mantene nan posicion.
Na januari a sigui cu e discusionnan cu minister y ta asina cu dialuna a yega na un acuerdo cu di banda di e compania lo busca un conseho independiente riba e structura salarial y e proceso cu a wordo hiba. Den e proceso aki e trahadornan hunto cu e sindicatonan ta haya oportunidad pa trece nan obhecionnan.
Di banda di minister a bisa cu si e resultado ta indica cu mester haci cambionan, cu nan ta dispuesto pa haci esaki tambe. E compania independiente of e conseho independiente mester ta dentro di 2 luna (60 dia) y na final di maart 2023 e resultado di e revision di e structura di salario lo wordo discuti cu tur partido na mesa.
Fuera di esey, e Raad di Comisarionan di Arubus a bay di acuerdo tambe cu asina mes cu yega na un acuerdo riba un structura salarial, esaki lo ta suheto na evaluacion dentro di un aña pa wak con el a bay y si e ta funciona of no, a bisa.
Di parti di minister, a haci un peticion pa extende e contrato colectivo pa un aña y e trahadornan ta dispuesto pa bay te hasta dos aña mes y pa esaki lo tin un compensacion di un suma di 1850 florin pa e extension di cada aña di e CAO, Magaly Brito a indica.
Un investigacion forensico tambe ta bay tuma lugar na Arubus, segun acuerdo entre minister y sindicato y esaki tambe lo forma parti di e discusionnan cu lo bin den e proximo simannan.
Pa aworaki tin trankilidad den Arubus, pendiente di e resultadonan di e investigacionnan pendiente.
