Caroline Hart, directora general:
ORANJESTAD (AAN) – Carolina Hart, Directora General di Respaldo, a duna di conoce den entrevista cu DIARIO, cu Respaldo ta bayendo hopi bon.
Respaldo tin hopi proyecto andando riba diferente tereno, por ehemplo riba tereno di ICT, training di personal, nan ta bezig cu reconstruccion na clinica, pero tambe nan ta bezig trahando duro riba e maneho di con pa atende cu tur e pashentnan.
“Manera ta conoci, algun tempo pasa a haci algun afspraak por escrito, tocante e verwijsnan di pashentnan, y p’esey ta hopi importante pa pueblo ta na haltura cu na momento cu un hende ta sinti cu e no ta bon di su salud mental, e por acudi na su docter di cas, e por dune un verwijsbrief pa e docter evalua si e persona ta cay den e casonan basico (menos complica), anto ora ta trata di casonan psiquiatrico compleho, cu mester di ayudo specializa, di un psikiatra, docter di cas ta verwijs pa Respaldo. Si no ta asina e caso ta wordo referi na Stichting Hunto. Nos tin bon comunicacion cu Stichting Hunto tambe”, Hart a indica.
El a agrega cu desde Covid-19, salud mental a haya mas atencion, hendenan ta durf mas di bin padilanti y meld, ora cu nan ta sinti cu nan salud mental ta bayendo atras, cual ta un desaroyo hopi positivo.
“Esey ta loke nos mester, cu hendenan kita estigma, hendenan mester papia mas habri di salud mental, pasobra e ta un malesa manera cualkier otro, cu bo tin cu haya ayudo p’e, si no e por bira peor. Den cuadro di esey, bo ta ripara cu e demanda pa haya guia y ayudo a keda crece y nos a ripara esey tambe den nos lista di spera, pasobra caminda cu bo ta kita hende di lista di spera cu ta wordo yuda, ta drenta casonan nobo”, Caroline Hart a señala.
Finalmente, Caroline Hart, directora di Respaldo a indica cu pa aworaki e capacidad cu nan tin pa atende cliente ta suficiente, pero pa aki algun aña si lo mester expande pasobra nan ta premira cu e ta bay bira chikito, y ta bay tin mester di un edificio totalmente nobo. Actualmente nan tin dos localidad, e clinica na Hospital y e locacion na Mahuma cu ta e policlinica, pa adulto y pa hende jong. Respaldo kier e clinica y e policlinica hunto, pues tur dos den un solo edificio, Hart a expresa.
