ORANJESTAD (AAN): Recientemente Respaldo a presenta na su stakeholders y invitadonan e Aspiracion 2030 y nan Logo Nobo.
E directora di Respaldo señora Caroline Hart a haci un presentacion na e diferente stakeholders cu ta traha cu Respaldo riba e tereno di salud mental.
Señora Hart a elabora riba e plannan pa futuro di Respaldo. E aspiracion cu Respaldo tin pa cu tratamento di su clientenan y di su empleadonan. E rol cu Respaldo kier tin den futuro pa cu e comunidad di Aruba.
E plannan no ta solamente pa brinda un miho servicio na e comunidad di Aruba den e area di Salud Mental, pero pa eleva e calidad di e servicio en general, como tambe riba tereno di sostenibilidad y inclusividad den Salud Mental. Ta di suma importancia pa cuminsa cu e trabou internamente unda cu e empleadonan ta central y ta hunga un rol hopi importante pa na final Respaldo por brinda nos comunidad e servicio di calidad cu ta necesario.
Hart a informa tambe di e proyectonan cu Respaldo ta ehecutando actualmente pa asina por logra e metanan di futuro. E proyectonan ta inclui, training pa e personal, servicionan nobo, colaboracion cu otro organisacionnan local y internacional como tambe sistemanan automatisa.
Riba e anochi aki tambe Respaldo a presenta su Logo Nobo. E logo nobo di Respaldo ta un simbolo poderoso cu visualmente ta duna bida na e meta principal, e vision y balornan basico. Cada elemento den e logo a ser diseña pa refleha e compromiso na cuido di salud mental y e meta pa un Aruba mentalmente mas sano.
E significado di e logo den su totalidad ta representa e Aspiracion 2030 di Respaldo cual ta: “Rumbo pa un organisacion di salud mental specialisa profesional y sostenibel pa un Aruba mentalmente sano". E man cu ta sostene e celebro ta personifica e mision pa traha hunto cu y rond di e cliente, poniendo semper nan bienestar na prome lugar. E strepinan cu ta conecta ta subraya e importancia di cooperacion, den Respaldo su organisacion y tambe cu e socionan, pa por ofrece un cadena di cuido sin obstaculo.
E colornan y simbolonan den e logo ta refleha tambe e ambicion pa sostenibilidad: Respaldo ta busca pa contribui na e '2030 Agenda for Sustainable Development Goals' di Nacionnan Uni, cu un enfoke riba salud mental sostenibel y un maneho sostenibel di su organisacion.
E logo aki ta mas cu solamente un imagen visual; e ta un resumen di ken Respaldo ta como organisacion, kico nan ta persigui y con nan ta conecta cu e comunidad cu nan ta sirbi. E ta representa e entrega continuo pa duna cuido di calidad halto, empatico y sostenibel na tur hende na Aruba.
