*Pa prome no ta visibel y na di dos, no tin sonido!
ORANJESTAD (AAN) – Thomas Ruiz, di Asociacion Rijscholen Aruba, a extende mas durante e entrevista cu DIARIO, tocante e uzo di E-scooter y su peligronan ora nan ta circula riba caminda publico.
El a señala cu e personanan cu ta bende y esnan cu ta uza e tipo di aparatonan aki, mester haya un training pa sa con pa maneha nan. Esaki pa motibo cu: na prome lugar pasobra nan no ta visible, y di dos, pasobra tampoco por scucha nan bin. Kiermen, no tin sonido.
“Nos tin cu compronde cu nos tin casi dos mil vehiculo registra na Departamento di Impuesto cu ta haci e densidad di e trafico hopi pega. Y si bo wak cuanto accidente tin pa aña, ta demasiado pa un isla. Pone un mucha riba un vehiculo asina, ta expon’e su mes na peligro”, Ruiz a menciona.
El a agrega cu tambe mester registra ki atributonan e E-scooter mester tin. “Mester bin cu bell, spiel, helm, mester tin luz, pa nan ta visible. Pues, ami lo recomenda mayornan no expone nan yiunan cu e peligro cu e vehiculo aki, riba caminda. Warda ora ta registra, cu e reglanan ta duidelijk, y e ora ey bo por sa kico lo bo por haci”, e experto den trafico Thomas Ruiz a señala.
Ruiz a menciona cu esaki ta conta pa tur E-Bike y C-Bike, y na Hulanda nan a legisla cu pa uza C-Bike mester tin helm bisti. “Y mi sa tambe, cu na Hulanda nan a traha un mashin especial pa midi, pa controla e speed. Mi kier sa cu nos no tin e akinan”, señor Thomas Ruiz a indica.
El a agrega cu tambe mester tene cuenta cu e bateria. E sa cu den exterior ta causa hopi problema si e ta rementa, si e persona no sa con pa handle, e por kima vivienda. “Di akinan mi ta haci un suplica na brandweer pa haci algo pa educa nos hendenan cu tin un di e aparatonan aki pa sa cual brandblusser nan por uza”, Thomas Ruiz a subraya.
