DIARIO a bay tras di e movecion di ala nobo den partido berde
*Sentencia Caso Avestruz por marca salida di Benny na April
*Stoel bashi den Parlamento si AVP pidi Benny bay cas back
ORANJESTAD(AAN)—Na momento di sorpresa den mundo politico, periodismo tin e deber pa bay investiga kico ta pasa y kico por ta causa di desaroyonan den seno politico.
Ta cu asombro DIARIO a tuma nota con pago relaciona cu un actividad musical for di inicio di decada 21, a trece un conmocion enorme na momento cu riba plataforma internacional e sonidonan di guera mundial y problemanan economico sumamente serio ta exigi tur atencion.
E asunto sigur merece atencion pasobra el a sobrevivi participacion di practicamente tur movecion politico actual of nan cuna, na Aruba.
Practicamente tur partido cu actualmente ta activo ainda of nan partido, mester a atende cu e forma cu a introduci, a mantene y finalmente a deshaci di e Festival di Musica na Aruba, cu e tempo a haya bastante acogida cerca publico, cu no a pensa cu el a laga un herencia fastioso atras pa politiconan.
Como gran sorpresa Aruba a wordo confronta cu ala nobo den seno di AVP, cu a dicidi cu e ta atende cu e asunto den cual Gabinete Mike Eman tabata tin un voz importante.
Aruba a papia di desunion politico y hasta tin hende ya a cuminsa pensa cual grupo den AVP nan mester sostene si realmente e partido conoce kiebra.
DIARIO a cumpli cu su trabou periodistico y no a bay tras di spiritonan sigur no den un panaroma politico cu a ofrece hopi oportunidad pa politiconan bisa cu nan ta habri ala bula bay.
Un storia tras otro a keda presenta riba asunto di e festival y casi DIARIO tabata a punto di forma un orkesta pa mira si por soluciona loke tabata pasa, ora informantenan valioso a splica DIARIO, cu no mester tene cuenta cu loke a pasa pero cu loke ta pasa y por spera cu ta pasa na April, ora Huez dicta veredicto den caso di Benny Sevinger, actual Miembro di Parlamento di AVP.
DIARIO a wordo saca for di tram di festival di musica y confronta cu e gran realidad cu e problema cu AVP ta confronta actualmente no ta relaciona cu musica pero mas bien cu e pagara cu ta rementa den e partido si Huez dicidi cu Benny Sevinger ta culpabel den e caso di entre otro corupcion y un grupo di basta family and friends di AVP ricibi castigo pa nan participacion den e Caso Avestruz.
Pa AVP e sentencia di Huez dia 14 di April no solamente ta dicidi si cantidad di representante di AVP den prison ta wordo amplia, pero mas ainda ta dicidi cu AVP mester yena un asiento den Parlamento, cu AVP a dicidi cu ta wordo ocupa dor di e acusado Benny Sevinger te na momento cu Huez dicidi si Benny Sevinger ta culpabel.
Cu otro palabra, ta den man di Huez pa dicidi riba e constelacion di representacion di AVP den Parlamento ya cu ta e sentencia di Huez ta dicidi si finalmente AVP, mester reemplasa Benny Sevinger den Parlamento manera AVP a priminti.
E caso Avestruz ta sigui haya un rabo mas largo cu e garganta di e avestruz den mundo politico di Aruba cu a bira escenario unico den Reino cu pa prome bez a conoce eleccion di un miembro di Parlamento cu tabata den prison den detencion preventivo.
Kico sentencia di Huez lo bira ningun hende por bisa pero cu e ta causa basta tension den AVP sigur ta un hecho segun informantenan cu a indica cu sigur e lider di AVP a forsa Aruba acepta representacion politico di parti di un acusado den Parlamento di Aruba.
Awe den seno di AVP ta wordo papia di ala cu kier bula riba son di festival di musica pero no ta papia di e situacion serio cu lo presenta den seno di Parlamento di Aruba relaciona cu e sentencia di Huez den caso di Avestruz, cu Benny Sevinger como acusado mayor y cantidad di family and friends di AVP cu lo ta envolvi.
