ORANJESTAD (AAN): Dia 30 di mei 2003 partido Red Democratico a keda funda.
Na ocasion di e fecha aki cu 19 aña pasa ReD a keda funda, directiva di ReD a convoca un Reunion Extradordinario di Miembronan riba 29 di mei 2022 na ATIA Building. E tabata un reunion presencial y virtual. A dicidi pa amplia e directiva y a keda den e directiva e siguiente personanan: Kinsahsa van der Bliek, Lorraine Cooijman, Rene Kock, Thomas Ruiz, Stefano Croes, Ricardo Croes y Rudy Lampe.
Rene Kock a keda eligi como e presidente nobo di ReD. E ta docente, felizmente casa cu 2 yiu. E ta combina su pasion pa su famia y pa su trabao como docente cu su interes pa cambia e política tradicional na Aruba. Segun estatutonan di ReD e presidente ta representa e organizacion aki ta gradici Kinsasha pa su presidencia durante eleccion pasa y Kinsasha lo sigui den e lucha, especialmente pa e sector primario haya su luga mereci na Aruba.
Pronto ta recorda cu un aña pasa eleccion a tuma lugar dia 25 di juni di 2021. ReD ta prepara pa e proximo eleccion, pasobra cambionan grandi no a tuma lugar, no a legaliza cannabis pa crea otro pilar economico, no tin integriteitskamer ni bureau integriteit, no a cambia e ley electoral pa arubianonan den exterior por vota, ley di financiamento di partidonan político a keda un tiger di papel, etc.
ReD ta keda habri pa forma un lista combina cu otro partidonan no tradicional. Y ReD ta habri pa ricibi miembronan nobo.
