ORANJESTAD (AAN): Fundacion Venerable Jose Gregorio Hernández a confirma na DIARIO, cu nan a ricibi e relikia di Beato Jose Gregorio Hernández y pa cu e ocasion aki, nos lo bay tin tres dia di oracion y alabansa.
E dianan di oracion y alabansa lo tuma luga pa 7:00 pm na lugar di Oracion, situa na Tanki Leendert 128 y ta manera ta sigui: Diaranson 27 di april cu Randall Croes. Tambe Diahuebs 28 di april cu Liesenny Croes. Tambe Diabierna 29 di april cu Etienne Yarzagaray.
Y diasabra 30 di april, cu ta e dia cu dr. Jose Gregorio Hernández a worde beatifica door di Papa Francisco aña pasa, lo bay tin un santo sacrificio di misa na Pro-Cathedral San Francisco di Asis na Playa pa 5’or di atardi. E santa misa lo worde celebra pa nos Vicario pastoor Andres, hunto cu otro pastoornan.
Despues di misa lo sali den un procesion di auto di Playa pa lugar di Oracion na Tanki Leendert y eynan vicario lo haci e ceremonia corespondiente na e relikia.
Nan ta invita tur deboto- y contribuyentenan y pueblo di Aruba en general pa asisti na e santa misa y bin den procesion di auto pa nos celebra e gran dia aki.
